Акафист всеобщего воскресения и страшного суда. Молимся вместе

Акафист о Страшном Суде Христовом
Кондак 1
Возбранный Воеводо и Господи, ада Победителю, хотяй паки приити со ангелы судити миру всему, не обличи моя тайная и лютая, сподоби мя деснаго стояния Твоего и милостию Твоею спаси мя, всегда зовуща Ти:

Икос 1
Ангелов Творче и Господи сил, умилосердися на мя грешную и блудную, наипаче в той день, егда небеса с шумом прейдут, стихии же сжигаемы разгорятся, егда солнце померкнет и луна не даст света и силы небесныя подвигнутся. Сего ради из глубины сердца моего взываю ти сице:
Иисусе, Сыне Божий, не осуди мя праведным судом Твоим.
Иисусе, Сыне Божий, избави мя шуияго от Тебе стояния.
Иисусе, Сыне Божий, сподоби мя одесную Тебе стати в час Суда.
Иисусе, Сыне Божий, не привлецы мене со грешники.
Иисусе, Сыне Божий, призови мене со праведники.
Иисусе, Сыне Божий, с делающими неправду не погуби мене.
Иисусе, Сыне Божий, водвори мене во обители праведных.
Иисусе, Сыне Божий, помилуй мя по велицей милости Твоей.

Кондак 2
Видя, яко кончина мира сего приближается, человекоубийца искони рассыпа нам прелести и соблазны, яко лев рыкает, иский кого поглотити; мы же скорбию сердца снедаеми, страха ради грядущих на вселенную мук, наипаче припадаем к Богородице, да спасет нас милостию Своею и да научит пети всех: Аллилуиа.

Икос 2
Разум неуразуменный разумети тщатся ангелы, ведуще, яко хощеши судити вселенную правдою и людям Своим в правоте: егда же поставятся престоли, река огненная ужасающая влечет всех пред Судилищем Твоим, где обрящуся аз, окаянный и блудный?! Тем же со страхом и трепетом вопию Ти:
Иисусе, Сыне Божий, сопричти мя ко овцам избраннаго Твоего стада.
Иисусе, Сыне Божий, Сыне Божий, от козлищ отлучи мя.
Иисусе, Сыне Божий, со пришедшими в первый час на виноградник Твой причти мя.
Иисусе, Сыне Божий, со наемники единодесятаго часа, ничтоже достойнаго соделавшими приими мя.
Иисусе, Сыне Божий, избави мя геены огненныя и тартара, егоже сатана трепещет.
Иисусе, Сыне Божий, водвори мя во обители Твоя, идеже ангелы непрестанно хвалу тебе поют.
Иисусе, Сыне Божий, червя неусыпающаго и прочих вечных мук свободи меня.
Иисусе, Сыне Божий, рая и вечнаго блаженства сподоби мя.
Иисусе, Сыне Божий, помилуй мя по велицей милости Твоей.

Кондак 3
Сила Вышняго восставит из праха тело мое и все естество человеческое трепещуще воскреснет. И кто стерпит страх тогда пещи горящей пред всеми, боящимися праведнаго Судища Твоего. Но Ты, о, Всесовершенный Господи, прежде глашения трубы воздаждь ми радость спасения Твоего, да пою Ти выну: Аллилуиа.

Икос 3
Имея Царство Твое, Царство всех веков, и владычество Твое во всяком роде, Отче щедрый, не судиши никомуже, но весь Суд отдал еси Сыну Твоему, Иже на престоле Славы Своея седяй, речет стоящим одесную Себе: Приидите возлюбленнии Отца Моего, наследуйте Царство, уготованное вам от сложения мира. Мы же грехами отягченнии и в страстех свое житие иждивше со умилением глаголем Ти сице:
Иисусе, Сыне Божий, хананею помиловавый, помилуй и меня окаяннаго.
Иисусе, Сыне Божий, сниди и ко мне милосердием Твоим, якоже омилосердовал еси.
Иисусе, Сыне Божий, разбойнику двери рая отверзый, отверзи и ми двери человеколюия Твоего.
Иисусе, Сыне Божий, помяни мя грешнаго во Царствии Твоем, якоже того разбойника.
Иисусе, Сыне Божий, манасиино воздыхание приемый, приими и мое воздыхание, грешника непотребнаго.
Иисусе, Сыне Божий, приемый покаяние праотца Давида, приими и мои в покаянии слезы и очисти мя от греха моего.
Иисусе, Сыне Божий, помилуй мя по велицей милости Твоей.

Кондак 4
Буря злых напастей грядет на ны, еще же и моры, и глады, и трусы по местам, и смятение языков, и за множество прегрешений оскудеет любовь многих: предаст же брат брата на смерть и дщерь матерь свою пред наступлением дня Господня - велкаго и страшнаго, но Ты, Господи, от Марии воссиявый, спаси ны, имиже веси судьбами, да все едиными устнами и единым сердцем поем Тебе: Аллилуиа.

Икос 4
Слышаще возлюбленнаго ученика Твоего Иоанна, яко змий из бездны страшен будет на малое время от темницы своея, антихрист сядет в храме, требуя поклонения себе, восплачем братие и сестры и возопиим ко Господу, имущему власть низводити даже до ада и паки возводити:
Иисусе, Сыне Божий, не допусти мене покланятися врагу Твоему.
Иисусе, Сыне Божий, лучше есть умрети до дне онаго.
Иисусе, Сыне Божий, избавь меня от сего страшнаго искушения.
Иисусе, Сыне Божий, ни муки, ни смерть не разлучат меня от любви Твоея.
Иисусе, Сыне Божий, Женише наш Сладчайший, отверзи нам двери славнаго Царствия Твоего.
Иисусе, Сыне Божий, среди дев благоразумных да обрящуся и аз грешный.
Иисусе, Сыне Божий, положи вся враги Твоя в подножие ног Твоих.
Иисусе, Сыне Божий, Сыне Божий, собери други твоя во едино окрест Тебе.
Иисусе, Сыне Божий, помилуй мя по велицей милости Твоей.

Кондак 5
Боготочною Кровию искупил нас еси от клятвы законныя, и ныне от страстей и мук спаси: сподоби же нас деснаго стояния Твоего, покрый нас кровом крылу Твоею, отжени от нас всякаго врага и супостата, да поем Тебе, Благодателю нашему: Аллилуиа.

Икос 5
Слышавше Предтечу Твоего глаголюща: покайтеся, приближи бо ся Царствие Божие в оньже без оглагольников, обличаются, без свидетелей осуждаются, книги деяний человеческих разгибаются и является все их тайное, тогда же никто не возможет помощи: ни отец, ни мати, ни брат не избавит осуждения, тем же из глубины сердца Ти глаголем:
Иисусе, Сыне Божий, посетивый Закхея мытаря, посети и мою душу.
Иисусе, Сыне Божий, избавь меня мытарства преисподней.
Иисусе, Сыне Божий, не отринул еси блудницу к Тебе со слезами припадшую, не отрини мене, подобнаго ей.
Иисусе, Сыне Божий, не отринувый, не отрини мене, преступавшаго заповеди Твоя.
Иисусе, Сыне Божий, воскресивый сына вдовицы, воскреси и мою душу, умершую через грехи.
Иисусе, Сыне Божий, Иаирови возвративый чадо, да придет ко мне паки любовь детская, нелицемерная.
Иисусе, Сыне Божий, извлекий Петра утопающаго, извлеки и мене из рова погибельнаго.
Иисусе, Сыне Божий, и мене трижды призови в служение Твое.
Иисусе, Сыне Божий, помилуй мя по велицей милости Твоей.

Кондак 6
Проповедницы богоноснии Твоего славнаго пришествия будут Енох и Илия, яко две маслины и яко два светильника, горящии пред Богом. По окончании же пророчества своего убиени будут и тридневно не оставят земли, но по сем победоносно восстанут ужасая неверующих и вознесутся на небесе, поюще Богу: Аллилуиа.

Икос 6
Возсияет вселенней просвещение истины Твоея, егда речеши и сущим ошуюю Тебе: "Изыдите от мене проклятии во огнь вечный, уготованный диаволу и аггелом его". Кто потерпит онаго страшнаго изречения? Но, о, Владыко долготерпеливый, воистину страшуся праведнаго Суда Твоего, боюся геены и тартара, ужасаюся тьмы кромешныя и общения с проклятыми. Тем же молю Твое благоутробие: яко Бог, грехи моя вся презрев, исторгни мя из бездны сея муки, конца не имеющей, да зову Ти сице:
Иисусе, Сыне Божий, Ты еси Един Судия Нелицеприятный.
Иисусе, Сыне Божий, слава праведному Суду Твоему.
Иисусе, Сыне Божий, не осуди меня со грешники, нарушающими закон Твой.
Иисусе, Сыне Божий, уповаю на благость Твою.
Иисусе, Сыне Божий, спаси мя ими же весть судьбами от сего вечнаго осуждения.
Иисусе, Сыне Божий, зриши от престола славы Твоея, яко боюся осуждения Твоего.
Иисусе, Сыне Божий, прежде онаго Суда к покаянию обрати мя.
Иисусе, Сыне Божий, душа моя и сердце мое жаждут покаяния и прощения.
Иисусе, Сыне Божий, помилуй мя по велицей милости Твоей.

Кондак 7
Хотяй паки приидти со ангелы и воздати каждому по достоянию деяний его. Господи, яко Давид вопию Ти: от тайных моих очисти мя и от чуждых пощади рабу Твою егда бо небо свившись, аки свитое, и всякий остров и всякий град подвигнется с места своего, море же и земля, и смерть и ад отдадут своя мертвецы. Спаси меня, Господи, вопию Ти, всегда зову Вседержителю Богу: Аллилуиа.

Икос 7
Новаго же небеси и новой земли по обетованию Господа чаем, в них же правда живет: прежнее небо и прежняя земля огню блюдомы для погибели нечестивых человек. И не помянут прежнюю землю, не взыдет на сердце их память от ней, ибо радость и веселие обрящут на новой земле; мы же таковому промышлению о нас дивящеся, вопием верно:
Иисусе, Сыне Божий, да услышу и аз вожделенный глас Твой: "Се ново вся творю".
Иисусе, Сыне Божий, да не буду удален тогда от Тебе.
Иисусе, Сыне Божий, верую, что ново все твориши, прекраснее и великолепнее всех прежних.
Иисусе, Сыне Божий, се будет новый Эдем.
Иисусе, Сыне Божий, сподоби мя узрети новое небо и новую землю огнем очищенную, в ней же правда живет.
Иисусе, Сыне Божий, да не сокрыются тогда вся чудеса Твоя от очес моих.
Иисусе, Сыне Божий, к наследникам новыя земли Твоея тогда причти меня.
Иисусе, Сыне Божий, гражданином новаго неба учини меня тогда по благости Твоей.
Иисусе, Сыне Божий, помилуй мя по велицей милости Твоей.

Кондак 8
Странное ангельским и человеческим мыслям будет восстание нечестивых против Бога Всевышняго. Соберется их великое множество против Бога, аки песок морской, но Христос убьет антихриста Духом Уст Своих и явлением пришествия Своего упразднит его. Вернии же вси, видя праведный Суд Божий, возопиют Богу: Аллилуиа.

Икос 8
Весь собор ангельский удивится, егда настанет час Страшнаго Суда Твоего, Господи, восплачется человечество великим плачем: грешнии же видяще трус и вся бываемая, бияще перси своя, возопиют: горы, падите на нас, и холми покрыйте нас от Лица Сидящаго на престоле, от гнева Агнца, прииде бо велий день гнева Его, и кто может устоять? Мы же, грешнии, ведуще сие, глаголем:
Иисусе, Сыне Божий, призри милосердно на нас с высоты Престола Твоего.
Иисусе, Сыне Божий, милосердию Твоему несть конца.
Иисусе, Сыне Божий, прими в страшный час сей молитвы Матери Твоея.
Иисусе, Сыне Божий, не имамы иныя Заступницы, разве Ея.
Иисусе, Сыне Божий, аще дел не обрящеши в нас, достойных милосердия Твоего, веру вместо дел вмени нам по великому человеколюбию Твоему.
Иисусе, Сыне Божий, вем яко вера без дел мертва есть.
Иисусе, Сыне Божий, не отрини нас во тьму кромешную, идеже есть плач и скрежет зубов.
Иисусе, Сыне Божий, жаждем спасения и рая вечнаго.
Иисусе, Сыне Божий, помилуй мя по велицей милости Твоей.

Кондак 9
Все естество ангельское воскликнет гласом велиим: "Благословен грядый во имя Господне, Вышний Сыне Живаго Бога, Слово Соприсносущное Отцу". От гласа же воскликновения сего ужаснется небо и подвигнутся основания земли; мы же грешнии бренными устами возопиим Богу: Аллилуиа.

Икос 9
Ветии многовещаннии не возмогут изрещи всех горестей дней тех, егда увянет всякая красота человеческая, море восшумит вельми, вселенная же отрясет звезды своя, якоже смоковница отрясет от ветра спелыя смоквы своя; всяк раб и всякий свободь скрыются в горах, пещерах и пропастях земных; и возжелают людие смерти, но смерть убежит от них. Мы же, грешнии, ведуще все сие грядущее на ны, возопием верно:
Иисусе, Сыне Божий, воистину правы Суды Твои.
Иисусе, Сыне Божий, по милости Твоей научи мя оправданиям Твоим.
Иисусе, Сыне Божий, да не услышу грознаго гласа Твоего: "Не вем вас."
Иисусе, Сыне Божий, призови нас во обители Твоя.
Иисусе, Сыне Божий, даждь и мне узрети Тя на облацех небесных.
Иисусе, Сыне Божий, да не устрашуся Тебе во славе Твоей.
Иисусе, Сыне Божий, во светлостях святых утеши и мя окаяннаго.
Иисусе, Сыне Божий, да восплачу о гресех своих.
Иисусе, Сыне Божий, помилуй мя по велицей милости Твоей.

Кондак 10
Спасти хотя мир от прелести вражия, послал еси Сына Твоего, Иже искупил ны от клятвы законныя Честною Своею Кровию. Апостолы же передаша Божественныя словеса Его: Се гряду скоро и возмездие Мое со Мною, яже воздати комуждо по делам его. Мы же, окаяннии, ведуще грехи своя, восклицаем Богу: Аллилуиа.

Икос 10
Стену необоримую в Тебе стяжахом, Богородице Приснодево, и душ всесовершенное спасение, аще бы не Ты предстала молящи, кто бы нас избавил от толиких бед, грядущих на вселенную: егда небесе прейдут и земли основания сотрясутся и приложатся горы в бездны морския. Ты же, Всеблаженная, простираеши присно руце Твои к Сыну Твоему, молящи о нас, погибающих, Твоея помощи, Твоего заступления к Сыну Твоему о взывающих тако:
Иисусе, Сыне Божий, рабий зрак приемый, помилуй рабов Твоих.
Иисусе, Сыне Божий, молитвами рождшия тя Богородицы помилуй нас.
Иисусе, Сыне Божий, молитвами Апостолов Твоих помилуй нас.
Иисусе, Сыне Божий, сии бо преподаша нам Евангелие Твое.
Иисусе, Сыне Божий, молитвами святых мучеников Твоих пощади души наша.
Иисусе, Сыне Божий, терние бо жития сего бреннаго мучат нас до крове.
Иисусе, Сыне Божий, молитвами святых Ангел и Архангел отжени от нас отчаяние.
Иисусе, Сыне Божий, предстательством хранителя нашего пощади нас в день страшнаго Суда Твоего.
Иисусе, Сыне Божий, помилуй мя по велицей милости Твоей.

Кондак 11
Пение всеумиленное приносим Ти, Царю Святый, Судие живых и мертвых. Сподоби и нас, Владыко, срести Тя на облацех, егда сядеши судити миру всему и деяния всяческих обнажатся: не ввержи нас тогда во тьму кромешную, но спаси нас, да зовем Ти выну: Алллилуиа.

Икос 11
Светоподательна светильника зрим возлюбленнаго ученика Твоего и Апостола Иоанна, емуже открыл еси вся тайны Царствия Твоего, грядущая возвестил ему, да всяк веруяй в Тя не погибнет, но имеет жизнь вечную, тем же вопием Ти сице:
Иисусе, Сыне Божий, Слава Тебе, утаившему сия от премудрых и разумных.
Иисусе, Сыне Божий, Слава Тебе, открывшему сия младенцам в вере.
Иисусе, Сыне Божий, даждь нам памятовати всегда Второе и страшное Пришествие Твое.
Иисусе, Сыне Божий, даждь памятуя сия избегать тяжких падений греховных.
Иисусе, Сыне Божий, даждь нам разум угождати Тебе, Солнцу Правды.
Иисусе, Сыне Божий, да покрыют малые добродетели наша великие наши беззакония.
Иисусе, Сыне Божий, страху Твоему пригвозди нас.
Иисусе, Сыне Божий, да убоимся творити волю князя тьмы.
Иисусе, Сыне Божий, помилуй мя по велицей милости Твоей.

Кондак 12
Благодать подаждь ми, Сладчайший Иисусе, да воспою Второе и Славное Пришествие Твое, и, памятуя горести и беды, грядущие на ны, возмогу избегнути сладости и прелести мира сего лукаваго, иже во зле лежит и воззову Богу во умилении сердца: Алллилуиа.

Икос 12
Поюще Твое Второе Пришествие, веруем вси, яко сядеши на Престоле Твоем предстоящим Тебе ангелам, пророкам, апостолам, мученикам и всем святым, и соберутся пред Тобою все народы от Адама первозданнаго и горе тогда всем, не имущим жития праведнаго, и аще праведник едва спасется, где обрящуся аз окаянный и паче всех грешнейший, не смею взирати на небо, токмо молюся:
Иисусе, Сыне Божий, милостив буди ми грешному.
Иисусе, Сыне Божий, помилуй мя, аще и беззакония превзыдоша главу мою.
Иисусе, Сыне Божий, наг от дел добрых стою пред Тобою.
Иисусе, Сыне Божий, помилуй мя, аще и струпы греховные покрыша тело мое.
Иисусе, Сыне Божий, помилуй мя, аще и недостоен есть воззрети на высоту небесную.
Иисусе, Сыне Божий, помилуй мя, аще и связан есть многими узами железными греха.
Иисусе, Сыне Божий, помилуй мя, аще же и ничтоже сотворих достойно милосердия Твоего.
Иисусе, Сыне Божий, в руце Твои милосердныя вручаю душу мою окаянную, сотвори милость со мною.
Иисусе, Сыне Божий, помилуй мя по велицей милости Твоей.

Кондак 13
О преславный и всещедрый Иисусе Христе! В последние дни грядый судити всю вселенную правдою, нынешнее приемши приношение, избави нас от мук и страстей, сподоби же нас деснаго стояния Твоего, да зовем Ти, Благодетелю нашему: Аллилуиа.
Этот Кондак читается трижды, затем Икос 1 и Кондак 1.

Молитва Господу, грядущему судити живых и мертвых
Господи, Царю Святый, Единородные Сыне Живаго Бога, искупивый нас Кровию Своею! Рекий Апостолом Своим: "Се гряду скоро и возмездие Мое со Мною, дабы воздати коемуждо по делам его". Умилосердися на нас грешных и блудных и непотребных рабов Твоих, ничто же достойно соделавших, недостойных милосердия, но достойных всякаго осуждения и муки. Даждь нам, Господи, прочее время живота нашего без порока прейти, наипаче же угодити Тебе, Солнцу Правды. Сподоби нас работати Тебе во вся дни живота нашего, егда же приидеши, Боже, на землю со славою, сподоби нас одесную Тебе стати, Судие Праведный. Не помяни наших беззаконий, но очисти их росою милости Твоея, отлучи от козлищ нас, Владыко Господи, части шуия нас избави. Сподоби нас отложивши ветхаго человека в новаго облещися и узрети огнем очищенное небо и землю Твои, в них же правда и радость и веселие живут.
Ты бо Источник Един жизни и сладость, и освящение любящих Тя, Господи, и Тебе славу воссылаем, со Безначальным Твоим Отцем и Пресвятым и Нетленным и Животворящим Твоим Духом, и ныне и присно и во веки веков. Аминь

Акафист в память всеобщего Воскресения и Страшного Суда

По возгласе иерея: Слава Святей, и Единосущней, и Животворящей, и Нераздельней Троице всегда, ныне и присно и во веки веков. Лик: Аминь. Диакон: Слава Тебе, Боже наш, слава Тебе. Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас. (Трижды) Слава Отцу и Сыну и Святому Духу, и ныне и присно и во веки веков. Аминь. Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй. (Трижды) Слава, и ныне: Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.

Псалом 26
Господь просвещение мое и Спаситель мой, кого убоюся? Господь Защититель живота моего, от кого устрашуся? Внегда приближатися на мя злобующым, еже снести плоти моя, оскорбляющии мя, и врази мои, тии изнемогоша и падоша. Аще ополчится на мя полк, не убоится сердце мое, аще востанет на мя брань, на Него аз уповаю. Едино просих от Господа, то взыщу: еже жити ми в дому Господни вся дни живота моего, зрети ми красоту Господню и посещати храм святый Его. Яко скры мя в селении Своем в день зол моих, покры мя в тайне селения Своего, на камень вознесе мя. И ныне се вознесе главу мою, на враги моя: обыдох и пожрох в селении Его жертву хваления и воскликновения, пою и воспою Господеви. Услыши, Господи, глас мой, имже воззвах: помилуй мя и услыши мя. Тебе рече сердце мое, Господа взыщу. Взыска Тебе лице мое, лица Твоего, Господи, взыщу. Не отврати лица Твоего от мене и не уклонися гневом от раба Твоего: помощник мой буди, не отрини мене, и не остави мене, Боже Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Твоем и настави мя на стезю правую враг моих ради. Не предаждь мене в душы стужающих ми, яко восташа на мя свидетеле неправеднии и солга неправда себе. Верую видети благая Господня на земли живых. Потерпи Господа, мужайся и да крепится сердце твое, и потерпи Господа.

Псалом 31
Блажени, ихже оставишася беззакония и ихже прикрышася греси. Блажен муж, емуже не вменит Господь греха, ниже есть во устех его лесть. Яко умолчах, обетшаша кости моя, от еже звати ми весь день. Яко день и нощь отяготе на мне рука Твоя, возвратихся на страсть, егда унзе ми терн. Беззаконие мое познах и греха моего не покрых, рех: исповем на мя беззаконие мое Господеви, и Ты оставил еси нечестие сердца моего. За то помолится к Тебе всяк преподобный во время благопотребно: обаче в потопе вод многих к нему не приближатся. Ты еси прибежище мое от скорби обдержащия мя: радосте моя, избави мя от обышедших мя. Вразумлю тя и наставлю тя на путь сей, воньже пойдеши, утвержу на тя очи Мои. Не будите яко конь и меск, имже несть разума: броздами и уздою челюсти их востягнеши, не приближающихся к тебе. Многи раны грешному, уповающаго же на Господа милость обыдет. Веселитеся о Господе, и радуйтеся, праведнии, и хвалитеся, вси правии сердцем.

Псалом 56
Помилуй мя, Боже, помилуй мя, яко на Тя упова душа моя, и на сень крилу Твоею надеюся, дондеже прейдет беззаконие. Воззову к Богу Вышнему, Богу, благодеявшему мне. Посла с Небесе и спасе мя, даде в поношение попирающыя мя, посла Бог милость Свою и истину Свою, и избави душу мою от среды скимнов. Поспах смущен, сынове человечестии, зубы их оружия и стрелы, и язык их меч остр. Вознесися на Небеса, Боже, и по всей земли слава Твоя. Сеть уготоваша ногам моим и слякоша душу мою, ископаша пред лицем моим яму и впадоша в ню. Готово сердце мое, Боже, готово сердце мое, воспою и пою во славе моей. Востани слава моя, востани псалтирю и гусли, востану рано. Исповемся Тебе в людех, Господи, воспою Тебе во языцех, яко возвеличися до Небес милость Твоя, и даже до облак истина Твоя. Вознесися на Небеса, Боже, и по всей земли слава Твоя.

Псалом 33
Благословлю Господа на всякое время, выну хвала Его во устех моих. О Господе похвалится душа моя, да услышат кротцыи и возвеселятся. Возвеличите Господа со мною и вознесем имя Его вкупе. Взысках Господа и услыша мя, и от всех скорбей моих избави мя. Приступите к Нему и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится Ангел Господень окрест боящихся Его, и избавит их. Вкусите и видите, яко благ Господь; блажен муж, иже уповает Нань. Бойтеся Господа, вси святии Его, яко несть лишения боящымся Его. Богатии обнищаша и взалкаша, взыскающии же Господа не лишатся всякаго блага. Приидите, чада, послушайте мене, страху Господню научу вас. Кто есть человек хотяй живот, любяй дни видети благи? Удержи язык твой от зла, и устне твои, еже не глаголати льсти. Уклонися от зла и сотвори благо. Взыщи мира, и пожени и. Очи Господни на праведныя, и уши Его в молитву их. Лице же Господне, на творящыя злая, еже потребити от земли память их. Воззваша праведнии, и Господь услыша их, и от всех скорбей их избави их. Близ Господь сокрушенных сердцем, и смиренныя духом спасет. Многи скорби праведным, и от всех их избавит я Господь. Хранит Господь вся кости их, ни едина от них сокрушится. Смерть грешников люта, и ненавидящии праведнаго прегрешат. Избавит Господь душы раб Своих, и не прегрешат вси, уповающии на Него. Слава, и ныне: Аллилуиа, аллилуиа, аллилуиа, слава Тебе Боже. (Трижды) Господи помилуй. (Трижды) Слава, и ныне:

Псалом 38
Рех: сохраню пути моя, еже не согрешати ми языком моим: положих устом моим хранило, внегда востати грешному предо мною. Онемех и смирихся, и умолчах от благ, и болезнь моя обновися. Согреяся сердце мое во мне, и в поучении моем разгорится огнь. Глаголах языком моим: скажи ми, Господи, кончину мою и число дней моих, кое есть? Да разумею, что лишаюся аз? Се пяди положил еси дни моя, и состав мой яко ничтоже пред Тобою, обаче всяческая суета всяк человек живый. Убо образом ходит человек, обаче всуе мятется: сокровищствует, и не весть, кому соберет я. И ныне кто терпение мое, не Господь ли? И состав мой от Тебе есть. От всех беззаконий моих избави мя, поношение безумному дал мя еси. Онемех и не отверзох уст моих, яко Ты сотворил еси. Отстави от мене раны Твоя: от крепости бо руки Твоея аз исчезох. Во обличениих о беззаконии наказал еси человека и истаял еси, яко паучину, душу его: обаче всуе всяк человек. Услыши молитву мою, Господи, и моление мое внуши, слез моих не премолчи: яко пресельник аз есмь у Тебе и пришлец, якоже вси отцы мои. Ослаби ми, да почию, прежде даже не отъиду, и ктому не буду.

Псалом 40
Блажен разумеваяй на нища и убога, в день лют избавит его Господь. Господь да сохранит его и живит его, и да ублажит его на земли, и да не предаст его в руки врагов его. Господь да поможет ему на одре болезни его: все ложе его обратил еси в болезни его. Аз рех: Господи, помилуй мя, исцели душу мою, яко согреших Ти. Врази мои реша мне злая: когда умрет и погибнет имя его? И вхождаше видети, всуе глаголаше сердце его, собра беззаконие себе, исхождаше вон и глаголаше вкупе. На мя шептаху вси врази мои, на мя помышляху злая мне. Слово законопреступное возложиша на мя: еда спяй не приложит воскреснути? Ибо человек мира моего, на негоже уповах, ядый хлебы моя, возвеличи на мя запинание. Ты же, Господи, помилуй мя и возстави мя и воздам им. В сем познах, яко восхотел мя еси, яко не возрадуется враг мой о мне. Мене же за незлобие приял и утвердил мя еси пред Тобою в век. Благословен Господь Бог Израилев от века и до века: буди, буди.

Псалом 69
Боже, в помощь мою вонми, Господи, помощи ми потщися. Да постыдятся и посрамятся ищущии душу мою, да возвратятся вспять и постыдятся хотящии ми злая. Да возвратятся абие стыдящеся глаголющии ми: благоже, благоже. Да возрадуются и возвеселятся о Тебе вси ищущии Тебе, Боже, и да глаголют выну, да возвеличится Господь, любящии спасение Твое: аз же нищ есмь и убог, Боже, помози ми: Помощник мой и Избавитель мой еси Ты, Господи, не закосни.

Псалом 70
На Тя, Господи, уповах, да не постыжуся в век. Правдою Твоею избави мя и изми мя, приклони ко мне ухо Твое и спаси мя. Буди ми в Бога Защитителя и в место крепко спасти мя, яко утверждение мое и прибежище мое еси Ты. Боже мой, избави мя из руки грешнаго, из руки законопреступнаго и обидящаго, яко Ты еси терпение мое, Господи, Господи, упование мое от юности моея. В Тебе утвердихся от утробы, от чрева матере моея Ты еси мой покровитель: о Тебе пение мое выну. Яко чудо бых многим, и Ты помощник мой крепок. Да исполнятся уста моя хваления, яко да воспою славу Твою, весь день великолепие Твое. Не отвержи мене во время старости, внегда оскудевати крепости моей, не остави мене. Яко реша врази мои мне, и стрегущии душу мою совещаша вкупе, глаголюще: Бог оставил есть его, пожените и имите его, яко несть избавляяй. Боже мой, не удалися от мене, Боже мой, в помощь мою вонми. Да постыдятся и исчезнут оклеветающии душу мою, да облекутся в студ и срам ищущии злая мне. Аз же всегда возуповаю на Тя и приложу на всяку похвалу Твою. Уста моя возвестят правду Твою, весь день спасение Твое, яко не познах книжная. Вниду в силе Господни, Господи, помяну правду Тебе Единаго. Боже мой, имже научил мя еси от юности моея, и до ныне возвещу чудеса Твоя, и даже до старости и престарения, Боже мой, не остави мене, дондеже возвещу мыщцу Твою роду всему грядущему, силу Твою и правду Твою, Боже, даже до вышних, яже сотворил ми еси величия. Боже, кто подобен Тебе? Елики явил ми еси скорби многи и злы, и обращься оживотворил мя еси, и от бездн земли возвел мя еси. Умножил еси на мне величествие Твое, и обращься утешил мя еси, и от бездн земли паки возвел мя еси. Ибо аз исповемся Тебе в людех, Господи, в сосудех псаломских истину Твою, Боже, воспою Тебе в гуслех, Святый Израилев. Возрадуетеся устне мои, егда воспою Тебе, и душа моя, юже еси избавил. Еще же и язык мой весь день поучится правде Твоей, егда постыдятся и посрамятся ищущии злая мне. Слава, и ныне: Аллилуия, аллилуия, аллилуия, слава Тебе Боже. (Трижды) Господи помилуй. (Трижды) Слава, и ныне:

Псалом 76
Гласом моим ко Господу воззвах, гласом моим к Богу, и внят ми. В день скорби моея Бога взысках руками моима, нощию пред Ним, и не прельщен бых. Отвержеся утешитися душа моя. Помянух Бога и возвеселихся, поглумляхся и малодушествоваше дух мой. Предваристе стражбы очи мои: смятохся и не глаголах. Помыслих дни первыя, и лета вечная помянух, и поучахся: нощию сердцем моим глумляхся, и тужаше дух мой: еда во веки отринет Господь, и не приложит благоволити паки? Или до конца милость Свою отсечет, сконча глагол от рода в род? Еда забудет ущедрити Бог? Или удержит во гневе Своем щедроты Своя? И рех, ныне начах: сия измена десницы Вышняго. Помянух дела Господня, яко помяну от начала чудеса Твоя, и поучуся во всех делех Твоих, и в начинаниих Твоих поглумлюся. Боже, во святем путь Твой: кто бог велий яко Бог наш? Ты еси Бог творяй чудеса: сказал еси в людех силу Твою, избавил еси мышцею Твоею люди Твоя, сыны Иаковли и Иосифовы. Видеша Тя воды, Боже, видеша Тя воды, и убояшася: смятошася бездны, множество шума вод, глас даша облацы, ибо стрелы Твоя преходят. Глас грома Твоего в колеси, осветиша молния Твоя вселенную: подвижеся и трепетна бысть земля. В мори путие Твои, и стези Твоя в водах многих, и следы Твои не познаются. Наставил еси яко овцы люди Твоя рукою Моисеовою и Ааронею.

Псалом 101
Господи, услыши молитву мою, и вопль мой к Тебе да приидет. Не отврати лица Твоего от мене: воньже аще день скорблю, приклони ко мне ухо Твое: воньже аще день призову Тя, скоро услыши мя. Яко исчезоша яко дым дние мои, и кости моя яко сушило сосхошася. Уязвен бых яко трава, и изсше сердце мое, яко забых снести хлеб мой. От гласа воздыхания моего прильпе кость моя плоти моей. Уподобихся неясыти пустынней, бых яко нощный вран на нырищи. Бдех и бых яко птица особящаяся на зде. Весь день поношаху ми врази мои, и хвалящии мя мною кленяхуся. Зане пепел яко хлеб ядях, и питие мое с плачем растворях. От лица гнева Твоего и ярости Твоея: яко вознес низвергл мя еси. Дние мои яко сень уклонишася, и аз яко сено изсхох. Ты же, Господи, во век пребываеши, и память Твоя в род и род. Ты воскрес ущедриши Сиона, яко время ущедрити его, яко прииде время. Яко благоволиша раби Твои камение его, и персть его ущедрят. И убоятся языцы имене Господня, и вси царие земстии славы Твоея. Яко созиждет Господь Сиона, и явится во славе Своей. Призре на молитву смиренных, и не уничижи моления их. Да напишется сие в род ин, и людие зиждемии восхвалят Господа. Яко приниче с высоты святыя Своея, Господь с Небесе на землю призре, услышати воздыхание окованных, разрешити сыны умерщвленных, возвестити в Сионе имя Господне, и хвалу Его во Иерусалиме. Внегда собратися людем вкупе и царем, еже работати Господеви. Отвеща ему на пути крепости его, умаление дней моих возвести ми. Не возведи мене во преполовение дней моих: в роде родов лета Твоя. В началех Ты, Господи, землю основал еси, и дела руку Твоею суть небеса. Та погибнут, Ты же пребываеши, и вся яко риза обетшают, и яко одежду свиеши я, и изменятся. Ты же тойжде еси, и лета Твоя не оскудеют. Сынове раб Твоих вселятся, и семя их во век исправится.

Псалом 90
Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тме преходящия, от сряща, и беса полуденнаго. Падет от страны твоея тысяща, и тма одесную тебе, к тебе же не приближится, обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши, и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его, с ним есмь в скорби, изму его, и прославлю его, долготою дней исполню его, и явлю ему спасение Мое.

Псалом 50
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших и лукавое пред Тобою сотворих, яко да оправдишися во словесех Твоих, и победиши внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отъими от мене. Воздаждь ми радость спасения Твоего, и Духом владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая: тогда возложат на олтарь Твой тельцы. Слава, и ныне: Аллилуиа, аллилуия, аллилуиа, слава Тебе Боже. (Трижды) Таже: Великая ектения. И абие поется во глас 1: Бог Господь, и явися нам, благословен Грядый во имя Господне. Стих 1: Исповедайтеся Господеви, яко благ, яко в век милость Его. Стих 2: Обышедше обыдоша мя, и именем Господним противляхся им. Стих 3: Не умру, но жив буду, и повем дела Господня. Стих 4: Камень, Егоже небрегоша зиждущии, Сей бысть во главу угла: от Господа бысть Сей, и есть дивен во очесех наших.

Тропарь, глас 1
Егда приидеши, Боже, на землю со славою, / и трепещут всяческая: / река же огненная пред судищем влечет, / книги разгибаются, и тайная являются, / тогда избави мя от огня неугасимаго / и сподоби мя одесную Тебе стати, Судие Праведнейший. Слава, и ныне: Богородичен: Час испытания и страшнаго пришествия Человеколюбца Владыки помышляя, / весь трепещу и, сетуя, вопию Ти: / Судие мой Праведнейший и Едине Многомилостиве, / кающася приими мя, Богородицы молитвами.

КАНОН ПОКАЯННЫЙКО ГОСПОДУ НАШЕМУ ИИСУСУ ХРИСТУ

Глас 8
Песнь 1
Ирмос: Воду прошед яко сушу, / и египетскаго зла избежав, / израильтянин, вопияше: / Избавителю и Богу нашему поим. Припев: Помилуй мя, Боже, помилуй мя. Ныне приступих аз грешный и обремененный / к Тебе, Владыце и Богу моему; / не смею же взирати на небо, / токмо молюся, глаголя: / даждь ми, Господи, ум, да плачуся дел моих горько. О, горе мне, грешному! / Паче всех человек окаянен есмь, / покаяния несть во мне; / даждь ми, Господи, слезы, / да плачуся дел моих горько. Слава: Безумне, окаянне человече, / в лености время губиши; / помысли житие твое и обратися ко Господу Богу, / и плачися о делех твоих горько. И ныне: Мати Божия Пречистая, / воззри на мя грешнаго, / и от сети диаволи избави мя, / и на путь покаяния настави мя, / да плачуся дел моих горько.

Песнь 3
Ирмос: Небеснаго круга Верхотворче Господи, / и Церкве Зиждителю, / Ты мене утверди в любви Твоей, / желаний краю, верных утверждение, / едине Человеколюбче. Внегда поставлени будут престоли на судищи страшнем, / тогда всех человек дела обличатся; / горе тамо будет грешным, в муку отсылаемым; / и то ведущи, душе моя, / покайся от злых дел твоих. Праведницы возрадуются, а грешнии восплачутся, / тогда никтоже возможет помощи нам, / но дела наша осудят нас; / темже прежде конца покайся от злых дел твоих. Слава: Увы мне великогрешному, / иже делы и мысльми осквернився, / ни капли слез имею от жестосердия; / ныне возникни от земли, душе моя, / и покайся от злых дел твоих. И ныне: Се, взывает, Госпоже, Сын Твой, / и поучает нас на доброе, / аз же грешный добра всегда бегаю; / но Ты, Милостивая, помилуй мя, / да покаюся от злых моих дел. Катавасия, таже малая ектения. По возгласе поем:

Седален, глас 6
Помышляю день страшный / и плачуся деяний моих лукавых: како отвещаю Безсмертному Царю, / или коим дерзновением / воззрю на Судию, блудный аз? / Благоутробный Отче, / Сыне Единородный и Душе Святый, помилуй мя. Слава, и ныне: Богородичен Связан многими ныне пленицами грехов / и содержимь лютыми cтрастьми и бедами, / к Тебе прибегаю, моему спасению, / и вопию: помози ми, Дево, Мати Божия.

Песнь 4
Ирмос: Услышах, Господи, / смотрения Твоего таинство, / разумех дела Твоя / и прославих Твое Божество. Широк путь зде и угодный сласти творити, / но горько будет в последний день, / егда душа от тела разлучатися будет: / блюдися от сих, человече, Царствия ради Божия. Почто убогаго обидиши, / мзду наемничу удержуеши, / брата твоего не любиши, / блуд и гордость гониши? / Остави убо сия, душе моя, / и покайся Царствия ради Божия. Слава: О, безумный человече, доколе углебаеши, яко пчела, / собирающи богатство твое? / Вскоре бо погибнет, яко прах и пепел: но / более взыщи Царствия Божия. И ныне: Госпоже Богородице, помилуй мя грешнаго, / и в добродетели укрепи, и соблюди мя, / да наглая смерть не похитит мя неготоваго, / и доведи мя, Дево, Царствия Божия.

Песнь 5
Ирмос: Просвети нас повелении Твоими, Господи, / и мышцею Твоею высокою / Твой мир подаждь нам, / Человеколюбче. Воспомяни, окаянный человече / како лжам, клеветам, / разбою, немощем, лютым зверем, / грехов ради порабощен еси; / душе моя грешная, того ли восхотела еси? Трепещут ми уди, / всеми бо сотворих вину: / очима взираяй, ушима слышай, языком злая глаголяй, / всего себе геенне предаяй; / душе моя грешная, сего ли восхотела еси? Слава: Блудника и разбойника кающася приял еси, Спасе, / аз же един леностию греховною отягчихся/ и злым делом поработихся; / душе моя грешная, сего ли восхотела еси? И ныне: Дивная и скорая помощнице всем человеком, / Мати Божия/ помози мне недостойному, / душа бо моя грешная того восхоте.

Песнь 6
Ирмос: Молитву пролию ко Господу, / и Тому возвещу печали моя, / яко зол душа моя исполнися, / и живот мой аду приближися, / и молюся яко Иона: / от тли, Боже, возведи мя. Житие на земли блудно пожих/ и душу во тьму предах, / ныне убо молю Тя, Милостивый Владыко: / свободи мя от работы сея вражия, / и даждь ми разум творити волю Твою. Кто творит таковая, якоже аз? / Якоже бо свиния лежит в калу, / тако и аз греху служу. / Но Ты, Господи, исторгни мя от гнуса сего/ и даждь ми сердце творити заповеди Твоя. Слава: Воспряни, окаянный человече, к Богу, / воспомянув своя согрешения, / припадая ко Творцу, слезя и стеня; / Той же, яко милосерд, / даст ти ум знати волю Свою. И ныне: Богородице Дево, / от видимаго и невидимаго зла сохрани мя, Пречистая, / и приими молитвы моя, и донеси я Сыну Твоему, да даст ми ум творити волю Его.
Катавасия, таже малая ектения. По возгласе абие чтется акафист.

АКАФИСТВ ПАМЯТЬ ВСЕОБЩЕГО ВОСКРЕСЕНИЯИ СТРАШНОГО СУДА

Кондак 1

Икос 1

Кондак 2
Вижду, Господи мой, Господи, яко вся знамения кончины века сего уже исполняются: вера святая в людех оскуде, беззакония умножишася, и любовь охладе; востают бо народ на народ, царство на царство, отец на сына и сын на отца, глады и трусы и пагубы изобилуют по местом, прельстители и предатели явишася, и гонения на верных Твоих воздвигошася, таже и проповедание Евангелия во свидетельство всем языком уже совершается, и скорбь великая посреди верных по вселенней распространяется, и по сих всех, разумея, яко близ есть кончина века сего, со страхом вопию Ти: Аллилуиа.

Икос 2
Разум неуразуменный времени страшнаго и неизглаголаннаго пришествия Твоего открыти верным хотя, Всеблагий Господи, дал еси нам в подобие того притчу смоковницы, глаголя: егда бо ваия ея будут млади и листвие прозябнет, ведите, яко близ есть лето. Тако и вы, егда видите сия вся, - бодрствуйте, яко близ есть, при дверех. Тем же и мы, пришед на конец веков, со умилением зовем Ти: Свят еси, Господи, Боже наш, притчами тайноводя нас во Царствие Свое, да всяк имеяй уши духовныя слышати, да слышит, даруй и мне уразумение Твоего евангельскаго проповедания, да плотския похоти попраше, духовно жительствую и к жатве всемирной уготовляюся. Свят еси, Господи, Боже наш, притчею жерновною поучай нас, яко от двоих, вкупе труждающихся и живущих, в той день един поемлется и един оставляется, - не остави мене тогда со грешники, делающими беззаконие, но очищение даруй и введи во Твое славное Царствие. Свят еси, Господи, Боже наш, глаголяй: молитеся, да не будет бегство ваше в зиме или в субботу, о веце кончины мира, яко о зиме гадательствуя; даждь ми, в сие осьмое тысячелетие живущему, стопы моя к бегству великому в сретение Твое уготовати и непрестанно помышляти грядущее помози ми. Свят еси, Господи, Боже наш, рекий: в чем застану, в том и сужду, - возбуди мя, множицею во грехи впадающа, к частому покаянию, да не обрящеши, пришед, мя неготоваго. Свят еси, Господи, Боже наш, Праведный и Милостивый, не вниди в суд с рабом Твоим, яко не оправдится пред Тобою всяк живый, - от лица же Твоего судьба моя изыдет. Свят еси, Господи, Боже наш, рекий: не всяк глаголяй Ми: Господи, Господи, внидет в Царствие Небесное, но творяй волю Отца Моего, - научи мя творити волю Твою. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 3
Силою Божества Твоего, Господи, воздвигл еси из гроба Лазаря, бездыханна четверодневна, и телеса усопших святых в час смерти и крестных страданий Твоих возставил еси; последи же и Сам тридневен воскресл еси от мертвых тою же силою Твоею. Веруем, яко грядет час и ныне уже есть, егда по гласу Твоему воскреснут мертвии, и востанут сущии во гробех, и изыдут сотворшии благая в воскрешение живота, а сотворшии злая в воскрешение суда. Не осуди тогда и мя, Владыко, по деянием моим, но помилуй со всеми в вере и надежде жизни вечныя усопшими, и пети не возбрани: Аллилуия.

Икос 3
Имеяй ключи ада и смерти, аще и глаголал еси, Господи, верному рабу Твоему Иоанну тайновидцу, стоявшему посреде седми светильников: Аз есмь Первый и Последний, и живый, и бых мертв, и се жив есмь во веки веков, аминь, - повелел же еси ему написати имже подобает быти вскоре. Сия страшная и близкая скончания мира сего быти помышляя, не с суетным любопытством, но со страхом и трепетом взываю Ти: Свят еси, Господи, Боже наш, Свидетелю верный, Первенец из мертвых, и Княже царей земных; любяй ны и омываяй ны от грех наших Кровию Своею, и ключи Царствия Небеснаго человеком вручивый, - укрепи мя в вере Твоей, да николиже отрекуся Тебе, но, аще понудитися, до крове постою за имя святое Твое. Свят еси, Господи, Боже наш, грядый на облацех небесных, да узрят Его всяко око и иже прободоша Его, и плачь сотворят о Нем тогда вся колена земная, - даруй и мне прежде дне того страшнаго плачь за грехи моя. Свят еси, Господи, Боже наш - Альфа и Омега, начало и конец, Первый и Последний - скажи ми кончину мою и число дней моих возвести ми. Свят еси, Господи, Боже наш, давый Откровение великому Иоанну, да уразумеем и мы, имже подобает быти вскоре. Того молитвами спаси мя в день великий гнева Твоего, егда ни горы, ни ущелья, ни камение возмогут укрыти грешники, бежащия от лица Твоего. Свят еси, Господи, Боже наш, апостолом Твоим Павлом поучаяй, яко аще имам пророчествия и тайны вся и веру, якоже и горы преставляти, любве же не имам, кая ми польза есть? Даждь ми любовь нелицемерну, да тяготу брата моего, якоже и свою, понесу, и душу мою положу за други своя. Свят еси, Господи, Боже наш, Любы неизреченная, даруй ми возлюбити Тя, якоже иногда возлюбих грех свой, и принеся плоды покаяния, сподоби поработати Тебе, якоже поработах прежде сатане льстивому, да из глубины души воспою: Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 4
Буря велия, разрушающая горы, предъидяше, трус и мрак, громы и молнии бываху, егда являлся Господь Илии в Хориве и Моисею на Синае; но сей страх малый есть прообраз последняго дне мира, о немже глаголал Господь учеником на горе Елеонстей и Иоанну на Патмосе. Тогда бо вся вселенная сотрясется: огнь, вода и вся стихии смятутся; и свет, и мрак, и кровь, и дым, и трубы Ангельския, и мертвецев востание, и вопль людей соединятся, возвещая Второе пришествие и Страшный Суд Его, и час отмщения. О, ужаснаго зрелища и испытания! Невозможно есть нам и изобразити сие: горе - грешным, и слава - праведным тогда. Милосерде Господи! Спаси мя тогда, молюся, да пою Ти: Аллилуиа.

Икос 4
Слышах Тя, Господи, усты Петровы глаголюща: яко нынешняя небеса и нынешняя земля Словом Твоим содержимы и огню блюдомы на День Суда и погибели нечестивых человек, аз содрогаюся, но на неизреченное милосердие Твое дерзая, новаго небеси и новыя земли по неложному Твоему обетованию чаю, в них же вся правда живет. Сия убо желанныя земли жителя мя сотвори тогда, Спасе, зовуща: Свят еси, Господи, Боже наш, неизследимый и непременимый вчера и днесь и во веки Той же еси, и лета Твоя не оскудеют; имеяй небеса и землю, яко ризу ветху сняти, в ризу нову и нетленну облецы мя. Свят еси, Господи, Боже наш, стояй у двери и стучаяй, и к слышащему глас Твой, и двери сердца отверзающему - входящий к нему и свечеряющий с ним. Вниди в дом смиренныя и грешныя души моея и свечеряй со мною, якоже с Лукою и Клеопою, ибо преклонился уже есть день жизни моея. Свят еси, Господи, Боже наш, Путь, Истина и Живот мой, настави мя на путь Твой, и пойду во истине Твоей. Свят еси, Господи, Боже наш, рекий древле: Марфо, Марфо, печешися и молвиши о мнозе, едино же есть на потребу, - даждь и ми ни о едином земном пещися, но и о небесном помышляти. Свят еси, Господи, Боже наш, рекий богатому: безумне! В сию же нощь душу твою истяжут от Тебе, а еже уготовал еси кому будет? Помози ми сокровище не земное, а небесное собирати, идеже ни червь, ни тля тлит, ни татие подкапывают и крадут. Свят еси, Господи, Боже наш, освяти мя во всей полноте Своей, да всесовершен дух мой и душа и тело непорочно в пришествие Твое да сохранятся. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 5
Боже, Боже мой, пришедый взыскати и спасти погибшаго, - призри на скорбь души моея: век бо мой скончавается, и Страшный Твой Престол предуготовляется, житие мое мимоидет, Суд же мне предлежит, грозя мне огненною мукою и пламенем неугасимым. Вонми, убо, молитве моей и не отрини слез моих, яко суетных: кто убо прииде к Тебе плача и не абие спасен бысть? Веру мою вместо дел вмени мне, Господи, и не взыщи дел, отнюдь оправдающих мя, яко тщуся творити тыя, но не имам их; но та вера моя да довлеет вместо всех, та да отвещает, та да оправдит, та да покажет мя причастника славы Твоея вечныя в невечернем дни Царствия Твоего, воспевающа: Аллилуия.

Икос 5
Провидя Даниил пророк, муж желаний, древле ясно Божественное Твое Второе пришествие, Владыко Господи, глагола: дондеже престолы поставишася, и Ветхий денми седе, одежди Его белы, аки снег, и власы главы Его, аки волна, чисты, и Престол Его пламень палящь; река огненная течет исходящи пред Ним; тысяща тысящ служаху Ему, и тмы тем предстояху Ему, на судищи седящему, и книги отверзошася. Пощади убо, пощади, Спасе, тогда Твое создание, слезно вопиющее Ти таковая: Свят еси, Господи, Боже наш, на Престоле Славы почиваяй, Ему же дадеся власть и честь, и Царство, и вси людие; племена и языцы Тому работают; Его же власть - власть вечная, яже не прейдет, и Царство Его не разсыплется. Свят еси, Господи, Боже наш, Великий и Страшный, Его же Даниил пророк святый видев, духом вострепета и смутися, - аз же, грешный, како дерзну узрети Тя и отвещати Тебе? Свят еси, Господи, Боже наш, Боже милости и щедрот и человеколюбия, - молитвами Пророка Твоего избави мя потока страшнаго реки огненныя, хотящаго поглотити мя за грехи моя. Свят еси, Господи, Боже наш, праведныя любяй и грешныя милуяй, горы мерилом разума поставивый, лик звездам исчитаяй и капли росныя ко ветров дыханию приложивый, - услыши стенание души моея, и вопль сердца моего к Тебе да приидет. Свят еси, Господи, Боже наш, Сердцеведче, Ему же вся, не токмо словеса, но чувствия и помышления содеянныя и несодеянныя наша ведомы суть, - не осуди мя по благости Твоей за всякое слово праздное и помыслы скверныя, яже аз изрекох и помыслих в житии моем. Свят еси, Господи, Боже наш, продолжи ми век к покаянию и на посечение со смоковницею безплодною не осуди мене. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 6
Проповедник Твой, Господи, духоносный Иоанн Богослов, видев во откровении славный Престол Небесный и под Престолом души убиенных за слово Божие, от великия скорби пришедших, иже и возопиша велегласно глаголюще: доколе, Владыко Святый и Истинный, не осудиши и не отмстиши за кровь нашу живущим на земли? и даны быша коемуждо им ризы белы, и заповедано бысть им пождати еще время мало, дондеже скончаются соратницы их, подобно им имущия избиены быти, яко да восполнится предопределенное число. О, великаго и неизреченнаго долготерпения Твоего, Владыко! Яко и до сего дне отмщение нечестивым отлагаеши. Но горе миру, егда Судия внезапу приидет и коегождо деяния обнажатся, тогда погибнут грешницы от лица Божия, а праведницы возвеселятся и возрадуются пред Богом во веки зовуще Ему: Аллилуия.

Икос 6
Возсиял еси на Фаворе, Христе Боже наш, и ученицы Твоя, елика вмещаху, славу Твою видеша; но и убояшася, и вострепеташа, и ниц падоша. С тою же неизреченною, но пребольшею всею славою приидеши на облацех в день он судити живых и мертвых, и явиши знамение великое, иже есть Крест Твой Честный, от конец земли и до конец небес простираяйся; егоже узревше, восплачут вся колена земная, ибо страх явления Лица Твоего земнородным страшнее по премногу есть всякаго в мире сем разрушения и пременения. Како срету Тя тогда, Боже мой, кий плач и ответ воздам Ти, не могий, бедный, вместити и иоты славы Твоея. Но на Твое несказанное милосердие уповая, всякий грех истинно кающагося побеждающее, дерзаю прежде конца возопити Ти: Свят еси, Господи, Боже наш, во свете живый неприступнем, - осени мя, грешнаго, светом Лица Твоего, и не опали огнем Божества Твоего, егда приидеши во Славе святей Своей. Свят еси, Господи, Боже наш, даяй знамения на небеси и на земли, посылаяй огнь, язву и глад на люди за множество беззаконий их, - сохрани мя от язв будущих и от чаши гнева Твоего проклятия, приключитися имущих в последнии дни мира сего. Свят еси, Господи, Боже наш, Слове необыменный, даруй ми слово благо отвещати на Страшнем Суде Твоем. Свят еси, Господи, Боже наш, глаголяй: побеждаяй наследит вся, и буду Ему Бог, и той мне будет в сына, - помози мне греха победителем явитися. Свят еси, Господи, Боже наш, рекий: яко страшливых и неверных, скверных, убийц и блудодейц, идолослужителей и всех лживых часть в езере, горящем огнем и серою, ожидает, - спаси и избави мя от части тоя. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 7
Хотящу Ти, о, Преблагословенный Господи Иисусе Христе, Боже наш, в день пакибытия, во Второе пришествие, явитися миру на облацех яко Судии и Мздовоздаятелю, - о, каковый Страшный Суд будет тогда, Ангелом во тьмах и тысящах предстоящим, Апостолом председящим, человеком во ужасе вводимым, книгам разгибаемым и делом и помыслом истязуемым? Кий суд будет мне, зачатому во гресех? Кто ми пламень, жгущий мя, угасит? Кто ми тьму просветит? Кто мя тогда защитит, аще не Ты Сам - Любы и Милость безконечная! Молитвами Пречистыя Матери Твоея и Ангела-хранителя моего спаси мя тогда, зовуща: Аллилуия.

Икос 7
Новое и последнее торжество явити сатане льстивому в мире попустивый, Владыко мой Господи, егда пред кончиною века сего открыется человек беззакония, сын погибели, сиречь - антихрист, егоже пришествие со всякою силою и знамениями и чудесы ложными будет; иже, число звериное имеяй, совратит многия люди от пути праваго, и печать свою страшную на тыя положит, гонение на верныя великое воздвигнет и мерзость запустения на месте святе поставит, и три лета с половиною владычествовати будет, егоже и последи убиеши Духом уст Своих. О, горе мне, грешному, в день той тогда! Како спасение обрящу и отцу лжи противостану, когда избранных часть прельстится и праведник едва спасется? Но, о, Премилостиве! Аще и не понесох тяготы и зноя дневнаго, обаче с наемники единонадесятаго часа сопричти мя и веру крепку во дни искушений во мне утверди, да зову Ти таковая: Свят еси, Господи, Боже наш, по неизреченному промышлению Твоему попустити имеяй в последнии дни воцаритися сыну гордому и погибельному, да верныя прославятся, неверныя же в конец посрамятся. Свят еси, Господи, Боже наш, два свидетеля тогда с небесе послати имеяй, да избранныя укрепят и антихристу окаяннному противостанут, и истину Твою смертию своею засвидетельствуют. Свят еси, Господи, Боже наш, прежде всех предрекий нам сия, быти подобающая, да зрим и не ужасаемся, и, избранных ради, сократити дни оныя хотяй. Свят еси, Господи, Боже наш, в терпении души нам стяжати заповедавый и до конца сия претерпевшему спасение обещавый, - посли и мне дух кротости и терпения с упованием перенести напасти тыя. Свят еси, Господи, Боже наш, изми мя тогда от сетей лукавого века сего и печати антихристовы избави мя. Свят еси, Господи, Боже наш, сохрани мя в малом стаде Твоем, имже дати Царство благоволил еси. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 8
Страннаго и страшнаго Втораго Твоего, Господи, пришествия помышляя сретение, трепещу, прещения Твоего боюся и гнева Твоего. Егда приидиши грешныя мучити, праведныя же спасти, - плачу и рыдаю, день оный воспоминая, и молю Тя прежде сего: Спасе мой, спаси мя! Да не прииду тогда в землю плача, да не вижду места тьмы, Христе Спасе мой! Ниже связан буду рукама и ногама вне чертога Твоего изверженный, одежду нетления имый оскверненную и не могий проглаголати, якоже глаголю Ти ныне: Аллилуиа.

Икос 8
Весь еси желание и сладость моя, Сладчайший Господи Иисусе, Упование всех концев земли. Поучаеши ныне о дне славнаго пришествия Твоего, глаголя: бдите и молитеся, не весте бо дне и часа, воньже Сын Человеческий приидет. Сие же ведите: яко аще ведал бы домовладыка, в кую стражу нощи тать приидет - бдел бых убо и не бы дал подкопати храма своего; сего ради и вы будите готови. Внимая убо сему словеси Твоему, благодарне взываю Ти: Свят еси, Господи, Боже наш, на всякое время и на всякий час бдети и ожидати дне великаго пришествия Твоего верным повелевый. Свят еси, Господи, Боже наш, о дне том и часе никому не открывый: ни людем праведным, ниже Ангелом Своим. Но якоже молния исходит от восток и является до запад, тако пришествие Свое, имущее быти яве и внезапу, изобразивый. Свят еси, Господи, Боже наш, обновивый водою во дни Ноя мир, грехами растлевший, егда внезапу потопи люди нечестивыя, ныне же огнем попалити хотяй землю беззаконную с человеки неверными. Свят еси, Господи, Боже наш, правы пути Твоя и словеса Твоя истинны и непреложны и не мимо идут они, аще небо и земля прейдут. Свят еси, Господи, Боже наш, не даждь ми отягчити сердце мое объядением, пиянством и печальми житейскими, или иным непотребством, да не внезапу найдет на мя день той. Свят еси, Господи, Боже наш, рекий: яко на Святаго Духа хулившему не оставится ни в сем веце, ни в будущем, - соблюди мя не износити хулу ни словесную, ни мысленную на имя Святое Твое. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 9
Все естество земных и преисподних ужасом многим содрогнется, и Силы Небесныя подвигнутся в той час, егда солнце померкнет, луна не даст света своего и звезды спадут с небес; небеса же с шумом мимо идут земли, пламенем горящей, и человеком, рыдающим, и ко Владыце всяческих, к Богу Страшному, со трепетом вопиющим: Аллилуиа.

Икос 9
Витии мира безумствуют, якоже и во дни Давида царя глаголюще: несть Бог, не видим Его! О, слепии! Почто не помышляете, яко неверием окамененнаго сердца своего себе огнь вечный готовите, и богоотступлением и прочими беззакониями кончину мира приближаете? Не слышасте ли из Писаний: яко невидимая Его от создания мира твореньми помышляема, видима суть: и присносущная сила Его и Божество. Очистите, убо, сердца своя и Бога узрите. Но пощади, Господи, от таковаго ожесточеннаго заблуждения и неверия ум, сердце и душу мою, да с верою, упованием и любовию образ пришествия Твоего всегда себе представляю и зову Ти: Свят еси, Господи, Боже наш, праведным судом Твоим всем нам в землю, от неяже взяты есмы, возвратитися повелевый и паки в день всеобщаго Воскресения из нея востати положивый. Свят еси, Господи, Боже наш, солнцу, луне и звездам некогда померкнути, а земли и всему, яже на ней, огнем преобразитися предопределивый, да вместо их явится небо ново и земля нова, в нихже правда живет. Свят еси, Господи, Боже наш, утаивый день, в оньже предстанут на суд вся племена и языцы, да восприимет кийждо по делом своим. Свят еси, Господи, Боже наш, Пастырю добрый и Судие Праведнейший, имеяй сести в день воздаяния Твоего на Престоле разсуждения, во еже разлучити же вся народы друг от друга, якоже пастырь разлучает овцы от козлищ; да поставиши овцы одесную себе, а козлища ошуюю, и речеши праведным сладкий глас: приидите, благословеннии Отца Моего, и наследуйте Царствие, уготованное вам от сложения мира. Свят еси, Господи, Боже наш, от Него же нераскаянные грешницы услышат тогда со страхом: отъидите от Мене, проклятии, во огнь вечный, уготованный диаволу и аггелом его. Свят еси, Господи, Боже наш, обещавый Церковь Свою до конца мира непоколебиму соблюсти, во еже неодоленней быти ей от всех врат адовых. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 10
Спасти хотя древле Лота праведнаго от запаления с содомлянами нечестивыми, Владыко Господи, извел еси его вон из града и рекл еси рабу Своему Аврааму: яко аще бы и десять праведник имел град сей, не бы тогда погибл бысть, но оскудения ради святых в нем и мерзости грешных огню предается. Последи же и учеником Своим в притче плевел сельных глаголал еси, яко плевелы и пшеница обоя купно имут расти до жатвы, да никогда прежде жатвы восторгающе плевелы восторгнется купно с ними и пшеница. От сего убо и назидаемся: яко токмо праведники Твоими мир сей стоит доселе, и ради святых Твоих, в мире живущих, даеши еще время и мне, грешному, покаятися, сего ради, неизследиме Боже, благодарно вопию Ти: Аллилуиа.

Икос 10
Царю царей, Господи Спасе, Агнче непорочный, на Престоле Славы седяй, яко лев, от колена Иудова и корене Давидова возсиявый и мир победивый. Ты един достоин еси разгнути Книгу Жизни великую и разрешити печати ея! Ты, яко Агнец закланный, достоин еси прияти силу, богатство и премудрость, крепость и честь, и славу, и благоволение - ихже воспевают Ти чины Ангельстии и дуси праведных на небеси. Сподоби убо и мя, недостойнаго, с ними славити Тя в день великий и в сей час звати тако: Свят еси, Господи, Боже наш, Содетелю и Промыслителю наш, сияяй светом солнечным и одождяй на добрыя и злыя; наказуяй и милуяй, нарицаяй не сущая, яко сущая; низводяй даже до ада и паки возводяй. Свят еси, Господи, Боже наш, имеяй праведники просияти, яко солнце во Царствии Своем, - не погуби мя ради святых Твоих, но в Книзе Животней напиши мя и имя Твое начертай на челе моем. Свят еси, Господи, Боже наш, день весь жития моего совершен, свят, мирен и безгрешен даруй ми. Свят еси, Господи, Боже наш, Ангела мирна, верна наставника и хранителя души и тела моего на всяко время неотлучна посли ми. Свят еси, Господи, Боже наш, по благодати Твоей, изобильно на ны излиянной, презри моя прегрешения и подаждь вся добрая и полезная души моей. Свят еси, Господи, Боже наш, прочее время живота моего сподоби мя в мире и покаянии скончати, ожидающу дне славнаго явления Твоего. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 11
Пение всеумиленное приношу Ти, Господи, Спасе и Содетелю мой, и молю Тя, егда приидеши судити миру всему на облацех, не постыди мя, студныя дела сотворшаго, и не погуби мя, якоже погубил еси Вавилон - великую блудницу, но, веры ради моея и любве к Тебе, жителя Сиона Горняго соделай мя, идеже есть глас велий народа многаго, яко глас вод многих и яко глас грома крепкаго, глаголющих: Аллилуиа.

Икос 11
Светильник мой угасе, елея же благих дел, во еже возжещи той, несть ми; и где обрящуся окаянный, сном греховным отягченный, егда постигнет мя внезапу полунощь - час кончины моея, или Суд Божий, яко тать найдет на вся живущая на земли? Но да не услышу аз, якоже юродивыя девы, грознаго гласа Жениха: не вем тя. Помози ми, о, Господи, наполнити сосуды души моея елеем благих дел, паче же милосердия и смирения, и звати Ти: Свят еси, Господи, Боже наш, даждь ми послужити меньшей братии Твоей, якоже Самому Тебе: алчущии и жаждущии насытити, странныя приютити, нагия одеяти, больныя и в темницех страждущия посещати, да сподоблюся части десныя стояния на Суде Твоем. Свят еси, Господи, Боже наш, отъими от мене дух гордости, праздности и уныния бесовскаго и подаждь ми дух смиренномудрия, целомудрия, кротости и радости духовныя. Свят еси, Господи, Боже наш, вложи в мысль мою мудрость сына Сирахова: помнити последняя моя, дабы во веки не согрешити. Свят еси, Господи, Боже наш, Женише, красный добротою паче всех человек, грядый в полунощи, - с мудрыми девами в рай введи мя. Свят еси, Господи, Боже наш, приими мольбу о нас и предстательство всех святых Твоих паче же простирающую к Тебе всегда о нас руце Своя Деву Пречистую, Тебе рождшую. Свят еси, Господи, Боже наш, огради нас святыми Твоими Ангелы и отжени от нас духов злобы поднебесных. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 12
Благодать Твою, Господи Боже наш, грешныя милующую, сведуще, аще и недостойное житие явихом; обаче надежду Воскресения и жизни вечныя имуще, христианския кончины живота нашего, безболезнены, непостыдны, мирны, Божественных Таин причастны, и добраго ответа на Страшнем Судищи Твоем всегда просим, во умилении зовуще: Аллилуиа.

Икос 12
Поюще Твое непостижимое о людех и о мире, Тобою сотворенном, промышление, Вседержителю Отче, Сыне и Душе, Господи наш, славлю Тя, создание и раб Твой, и, яко чадо Церкве Православныя, чаю Воскресения мертвых и жизни будущаго века; в веце же настоящем молю Тя, Блаже: избави мя искушений, от мира, плоти и диавола находящих на мя, и укрепи в вере несумненней и любви к Тебе; да благочестне, чисто и свято прочее время живота поживу и сподоблюся части правыя в день пакибытия, зовуща Ти: Свят еси, Господи, Боже наш, Мздовоздаятелю Праведный, судити имеяй на велицем Престоле Своем, от Егоже Лица побегнут небо и земля, и место их не обретется. Свят еси, Господи, Боже наш, всем нам явитися пред Судище Твое положивый, да воздаши коемуждо яже с телом содела: благая или злая; еже предопределил еси мне прежде дне того скончатися, - даждь ми безбедно прейти мытарства воздушныя бесовския и оправдатися на первом, частном, суде Твоем. Свят еси, Господи, Боже наш, сатану и аггелы его, зверя и лжепророка во езеро огненное на мучения вечныя Архангелом Твоим Михаилом ввергнути имеяй; того предстательством избави мя муки страшныя, тартара и тьмы кромешныя и геенны огненныя, идеже червь не умирает и огнь не угасает. Свят еси, Господи, Боже наш, всех Твоих ради святых, изряднее же святых Твоих щедрот и Крове Твоея, за ны пролиянныя, жителя мя сотвори Иерусалима Небеснаго, идеже несть ни смерти, ни плача, ни вопля, ни болезни, ни скверны некия, но жизнь безконечная, и слава Твоя присно осеняет его. Свят еси, Господи, Боже наш, прежде сих всех помози ми соблюдати словеса евангельския, творити волю Твою и прилежно внимати пророчеству Откровения Иоаннова, яко время близ есть. Свят еси, Господи, Боже наш, рекий в конец Богослову: яко, дондеже суд приидет, скверный - да сквернится еще, а святый - да святится еще. Ей, гряду скоро, и мзда Моя со Мною есть. Аминь! Ей, гряди, Господи Иисусе, молит Тя Церковь Твоя, зовущи: Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 13
О Великий и Непостижимый Боже! Альфа и Омега, начало и конец всему сущему, Иже вчера, днесь и во веки Той же, и у Него же несть пременения, Егоже и лета не оскудеют. Приими сие малое акафистное моление мое в память грядущаго и Страшнаго Суда Твоего, всегда мною Тебе приносимое, и, по множеству щедрот Твоих, очисти беззакония моя, и имя мое в Книзе Живота напиши, и в юдоль плача не осуди, егда судити сядеши; и от пресветлаго лица Твоего не отлучи мене. Да егда скончаются дни века сего, и небеса и земля сия мимо идут, и светила, яко воск истаят, тогда, о, Всемилостиве, да узрю и аз стены Горняго Иерусалима, и купно со избранными десными Твоими овцами вниду во святый град сей и тамо насыщуся славы Твоея и буду пети Ти песнь нову во вся веки веков: Аллилуиа. Сей кондак читается трижды, таже:

Икос 1
Архангельския трубы возглашение, на Суд Господень Страшный и Последний, живыя и мертвыя от всех конец земли собирающее, уже во ушесех предносится. Душе моя, душе моя, востани, что спиши? Конец приближается, и имаши смутитися. Воспряни убо, яко мало есть еще время на покаяние; бодрствуй, молися и трезвися и дела добрая твори, непрестанно вопиющи ко Владыце своему таковая: Свят еси, Господи, Боже наш, и Пресвят, и да святится и в сем грешном и во зле лежащем мире имя Твое, паче всякаго имене. Свят еси, Господи, Боже наш, да приидет Твое славное Царствие. Свят еси, Господи, Боже наш, да будет во всем воля Твоя святая на земли, якоже пребывает и на небеси. Свят еси, Господи, Боже наш, хлеб земный насущный даяй нам, паче же небесный даждь ми на всяк день. Свят еси, Господи, Боже наш, остави ми согрешения моя, якоже и аз оставляю брату своему согрешения его. Свят еси, Господи, Боже наш, не введи мя в напасть, но избави мя от сетей лукаваго миродержителя тьмы века сего, ибо поистине опасно ходим и дние наша лукави суть. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 1
Предвечный Царю веков, Творче и Господи, Судие Праведнейший и нелицеприятный, множество содеянных мною лютых помышляя, окаянный аз, трепещу Страшнаго Дне Суднаго, но, надеяся на милость неизреченнаго благоутробия Твоего, давидски молю Тя: по велицей Твоей милости прости мя недостойнаго, и не осуди мя по деянием моим, яко да благою совестию очищен, на всяк день и час Ангельскую песнь приношу Ти: Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Прокимен, глас 7:
Господи, да не яростию Твоею обличиши мене, ниже гневом Твоим накажеши мене. Стих: Услыши, Боже, глас мой, внегда молити ми ся к Тебе. Евангелие от Матфея, зачало 106, глава 25, стихи 31-46. Слава: Молитвами Апостолов, Милостиве, очисти множество согрешений наших. И ныне: Молитвами Богородицы, Милостиве, очисти множество согрешений наших. Помилуй мя, Боже, по велицей милости Твоей, и по множеству щедрот Твоих очисти беззаконие мое.

Стихира, глас 6:
Возгласят трубы, и истощатся гробы, и воскреснет человеческое все естество трепещущее, добрая содеявшии, в радости радуются, чающе мзду восприяти: согрешившии же трепещут, люте рыдающе, в муку посылаеми, и от избранных разлучаеми. Господи Славы, ущедри нас яко благий, и части сподоби возлюбивших Тя.
Диакон: Господу помолимся.
Лик: Господи помилуй.
И чтем молитву сию:
Яко на Страшнем Твоем, и нелицеприемнем предстояй Судилищи, Христе Боже, и осуждения подъемля, и слово творя о содеянных мною злых: сице днесь, прежде даже не приити дневи осуждения моего, у святаго Твоего Жертвенника предстоя пред Тобою, и пред страшными и святыми Ангелы Твоими, преклонен от своея совести, приношу лукавая моя и беззаконная деяния, являяй сия и обличаяй. Виждь, Господи, смирение мое, и остави вся грехи моя, виждь яко умножишася паче влас главы моея беззакония моя. Кое убо не содеях зло? Кий грех не сотворих? Кое зло не вообразих в души моей? Всякое мое чувство и всякий уд оскверних, растлих, непотребен сотворих, делателище быв всячески диаволе. И вем, Господи, яко беззакония моя превзыдоша главу мою. Но безмерно есть множество щедрот Твоих, и милость неизреченна незлобивыя Твоея благости, и несть грех, побеждающь человеколюбие Твое. Темже, Пречудный Царю, незлобиве Господи, удиви и на мне, грешнем, милости Твоя, покажи благости Твоея силу и яви крепость благоутробнаго милосердия Твоего, и обращающася приими мя, грешнаго. Приими мя, якоже приял еси блуднаго, разбойника, блудницу. Приими мя, пребезмерне и словом, и делом, и похотию безместною, и помышлением безсловесным согрешивша Тебе. И якоже во единонадесятый час пришедших приял еси, ничтоже достойно соделавших, тако приими и мене, грешнаго: много бо согреших, и осквернихся, и опечалих Духа Твоего Святаго, и огорчих человеколюбную утробу Твою, и делом, и словом, и помышлением, в нощи и во дни, явленне же и неявленне, волею же и неволею. И вем, яко представиши грехи моя предо мною таковы, яковы же мною содеяшася, и истяжеши слово со мною, о ихже разумом непрощенно согреших. Но, Господи, Господи, да не праведным судом Твоим, ниже яростию Твоею обличиши мя, ниже гневом Твоим накажеши мя. Помилуй мя, Господи, яко не токмо немощен есмь, но и Твое есмь создание. Ты убо, Господи, утвердил еси на мне страх Твой, аз же лукавое пред Тобою сотворих, Тебе убо единому согреших. Но молю Тя, не вниди в суд с рабом Твоим. Аще бо беззакония назриши, Господи, Господи, кто постоит? Аз бо есмь пучина греха и несмь достоин, ниже доволен воззрети и видети на высоту небесную от множества грехов моих, ихже несть числа. Киими бо не растлихся грехи? Киими не содержахся злыми? Всяк грех содеях, всякую нечистоту вложих в душу мою: непотребен бых Тебе, Богу моему, и человеком. Кто возставит мя, в сицевая злая и толикая падшаго согрешения? Господи Боже мой, на Тя уповах: аще есть ми спасения упование, аще побеждает человеколюбие Твое множества беззаконий моих, буди ми Спаситель, и по щедротам Твоим и милостем Твоим, ослаби, остави, прости ми вся, елика Ти согреших, яко многих зол исполнися душа моя, и несть во мне спасения надежды. Помилуй мя, Боже, по велицей милости Твоей, и не воздаждь ми по делом моим, и не осуди мя по деянием моим, но обрати, заступи, избави душу мою от совозрастающих ей зол и лютых восприятий. Спаси мя ради милости Твоея: да идеже умножится грех, преизобилует благодать Твоя. Даруй ми слезы сокрушения и умиления сердечнаго, возводящая падшия ко своему наследию, ими же очищуся от всякаго греха, ибо страшно и грозно место имам проити, тела разлучився: множество тогда, мрачное и безчеловечное демонов срящет мя, и никтоже в помощь спутствуяй или избавляяй, но дела моя осудят мя. Сего ради прежде конца в покаянии приими мя и никогдаже отлучайся мене, раба Твоего, но всегда во мне почивай, не предаждь мене крамоле змиине и желанию сатанину не остави мене, яко семя тли во мне есть. Ты убо, Господи Боже покланяемый, Царю Святый, Иисусе Христе, сохрани мя Духом Твоим Святым, Имже освятил еси Твоя ученики. Даждь, Господи, и мне, недостойному рабу Твоему, спасение Твое: ум мой светом разумения Святаго Евангелия Твоего просвети, душу любовию Креста Твоего озари, сердце чистотою словесе Твоего убели, тело мое Твоею страстию безстрастною исцели, мысль мою Твоим смирением сохрани, и воздвигни мя к деланию заповедей Твоих, и даруй ми бодренным сердцем и трезвенной мыслию всю настоящаго жития нощь прейти, ожидающему пришествия светлаго и явленнаго дне Твоего. Ты убо еси, Господи, Свет, паче всякаго света, Радость, паче всякия радости, Упование, паче всякаго упования, Жизнь истинная и Спасение, пребывающее во веки веков. Аминь!

Песнь 7
Ирмос: От Иудеи дошедше отроцы, / в Вавилоне иногда, / верою Троическою пламень пещный попраша, поюще: / отцев Боже, благословен еси. Не надейся, душе моя, / на тленное богатство и на неправедное собрание, / вся бо сия не веси, кому оставиши, / но возопий: помилуй мя, Христе Боже, недостойнаго. Не уповай, душе моя, / на телесное здравие / и на скоромимоходящую красоту, / видиши бо, яко сильнии и младии умирают; / но возопий: помилуй мя, Христе Боже, недостойнаго. Слава: Воспомяни, душе моя, вечное житие, / Царство Небесное, уготованное святым, / и тьму кромешную и гнев Божий злым, / и возопий: помилуй мя, Христе Боже, недостойнаго. И ныне: Припади, душе моя, к Божией Матери и помолися Той, / есть бо скорая помощница кающимся, / умолит Сына Христа Бога, / и помилует мя недостойнаго.

Песнь 8
Ирмос: Царя Небеснаго, / Егоже поют вои ангельстии, / хвалите и превозносите во вся веки. Како не имам плакатися, егда помышляю смерть, / видех бо во гробе лежаща брата моего, / безславна и безобразна? / Что убо чаю, и на что надеюся? / Токмо даждь ми, Господи, прежде конца покаяние. (Дважды) Слава: Верую, / яко приидеши судити живых и мертвых, / и вси во своем чину станут, / старии и младии, владыки и князи, / девы и священницы; / где обрящуся аз? / Сего ради вопию: / даждь ми, Господи, прежде конца покаяние. И ныне: Пречистая Богородице, / приими недостойную молитву мою / и сохрани мя от наглыя смерти, / и даруй ми прежде конца покаяние. Катавасия, таже поем: Честнейшую...

Песнь 9
Ирмос: Воистинну Богородицу Тя исповедуем, / спасеннии Тобою, Дево Чистая, / с безплотными лики Тя величающе. Ныне к вам прибегаю, Ангели, Архангели / и вся Небесныя Силы, / у Престола Божия стоящии, / молитеся ко Творцу своему, / да избавит душу мою от муки вечныя. Ныне плачуся к вам, / святии патриарси, царие и Пророцы, / Апостоли и святителие / и вси избраннии Христовы: / помозите ми на суде, / да спасет душу мою от силы вражия. Слава: Ныне к вам воздежу руце, / святии мученицы, / пустынницы, девственницы, / праведницы и вси святии, / молящиися ко Господу за весь мир, / да помилует мя в час смерти моея. И ныне: Мати Божия, / помози ми, на Тя сильне надеющемуся, / умоли Сына Своего, / да поставит мя недостойнаго одесную Себе, / егда сядет судяй живых и мертвых, аминь. Таже: Достойно есть... Малая ектения. И по возгласе стихиры на хвалитех, глас 6: Стих: Хвалите Его в кимвалех доброгласных, хвалите Его в кимвалех восклицания. Всякое дыхание да хвалит Господа. Помышляю день оный и час, егда имамы вси нази и яко осуждени, неумытному Судии предстати, тогда труба возшумит вельми, и основания земли подвижатся, и мертвии от гробов воскреснут, и возрастом единем вси будут, и всех тайная явленна предстанут пред Тобою и возрыдают, и восплачутся, и во огнь кромешный отъидут, иже николиже покаяшася: и в радость и веселие праведных жребий внидет в чертог небесный. Стих: Исповемся Тебе, Господи, всем сердцем моим, повем вся чудеса Твоя. Даниил пророк, муж желаний быв, властительное Божие видев, сице вопияше: Судия седе и книги разгнушася. Блюди, душе моя, постиши ли ся? ближняго твоего не презри; от брашен воздержиши ли ся? брата твоего не осуждай, да не в огнь отсылаема сгориши, яко воск, но да без преткновения ведет тя Христос в Царствие Свое.
Слава, и ныне, глас 8:
Егда поставятся престоли и отверзутся книги, и Бог на Суде сядет, о кий страх тогда Ангелом, предстоящим в страсе, и реце огненней влекущей! Что сотворим тогда, во многих гресех повиннии человецы? Егда же услышим зовуща Его благословенныя Отца в Царство, грешныя же отсылающа в муку, кто потерпит страшнаго онаго изречения? Но, едине Человеколюбче Спасе, Царю веков, прежде даже кончина не приспеет, покаянием обратив, помилуй мя. Славословие великое и отпуст.

Апрель 25th 2011 -

Акафист в память Всеобщего Воскресения и Страшного Суда








Вижду, Господи мой, Господи, яко вся знамения кончины века сего уже исполняются: вера святая в людех оскуде, беззакония умножишася, и любовь охладе; востают бо народ на народ, царство на царство, отец на сына и сын на отца, глады и трусы и пагубы изобилуют по местом, прельстители и предатели явишася, и гонения на верных Твоих воздвигошася, таже и проповедание Евангелия во свидетельство всем языком уже совершается, и скорбь великая посреди верных по вселенней распространяется, и по сих всех, разумея, яко близ есть кончина века сего, со страхом вопию Ти: Аллилуиа.

Разум неуразуменный времени страшнаго и неизглаголаннаго пришествия Твоего открыти верным хотя, Всеблагий Господи, дал еси нам в подобие того притчу смоковницы, глаголя: егда бо ваия ея будут млади и листвие прозябнет, ведите, яко близ есть лето. Тако и вы, егда видите сия вся, — бодрствуйте, яко близ есть, при дверех. Тем же и мы, пришед на конец веков, со умилением зовем Ти:
Свят еси, Господи, Боже наш, притчами тайноводя нас во Царствие Свое, да всяк имеяй уши духовныя слышати, да слышит, даруй и мне уразумение Твоего евангельскаго проповедания, да плотския похоти попраше, духовно жительствую и к жатве всемирной уготовляюся.
Свят еси, Господи, Боже наш, притчею жерновною поучай нас, яко от двоих, вкупе труждающихся и живущих, в той день един поемлется и един оставляется, — не остави мене тогда со грешники, делающими беззаконие, но очищение даруй и введи во Твое славное Царствие.
Свят еси, Господи, Боже наш, глаголяй: молитеся, да не будет бегство ваше в зиме или в субботу, о веце кончины мира, яко о зиме гадательствуя; даждь ми, в сие осьмое тысячелетие живущему, стопы моя к бегству великому в сретение Твое уготовати и непрестанно помышляти грядущее помози ми.
Свят еси, Господи, Боже наш, рекий: в чем застану, в том и сужду, — возбуди мя, множицею во грехи впадающа, к частому покаянию, да не обрящеши, пришед, мя неготоваго.
Свят еси, Господи, Боже наш, Праведный и Милостивый, не вниди в суд с рабом Твоим, яко не оправдится пред Тобою всяк живый, — от лица же Твоего судьба моя изыдет.
Свят еси, Господи, Боже наш, рекий: не всяк глаголяй Ми: Господи, Господи, внидет в Царствие Небесное, но творяй волю Отца Моего, — научи мя творити волю Твою.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Силою Божества Твоего, Господи, воздвигл еси из гроба Лазаря, бездыханна четверодневна, и телеса усопших святых в час смерти и крестных страданий Твоих возставил еси; последи же и Сам тридневен воскресл еси от мертвых тою же силою Твоею. Веруем, яко грядет час и ныне уже есть, егда по гласу Твоему воскреснут мертвии, и востанут сущии во гробех, и изыдут сотворшии благая в воскрешение живота, а сотворшии злая в воскрешение суда. Не осуди тогда и мя, Владыко, по деянием моим, но помилуй со всеми в вере и надежде жизни вечныя усопшими, и пети не возбрани: Аллилуия.

Имеяй ключи ада и смерти, аще и глаголал еси, Господи, верному рабу Твоему Иоанну тайновидцу, стоявшему посреде седми светильников: Аз есмь Первый и Последний, и живый, и бых мертв, и се жив есмь во веки веков, аминь, — повелел же еси ему написати имже подобает быти вскоре. Сия страшная и близкая скончания мира сего быти помышляя, не с суетным любопытством, но со страхом и трепетом взываю Ти:
Свят еси, Господи, Боже наш, Свидетелю верный, Первенец из мертвых, и Княже царей земных; любяй ны и омываяй ны от грех наших Кровию Своею, и ключи Царствия Небеснаго человеком вручивый, — укрепи мя в вере Твоей, да николиже отрекуся Тебе, но, аще понудитися, до крове постою за имя святое Твое.
Свят еси, Господи, Боже наш, грядый на облацех небесных, да узрят Его всяко око и иже прободоша Его, и плачь сотворят о Нем тогда вся колена земная, — даруй и мне прежде дне того страшнаго плачь за грехи моя.
Свят еси, Господи, Боже наш — Альфа и Омега, начало и конец, Первый и Последний — скажи ми кончину мою и число дней моих возвести ми.
Свят еси, Господи, Боже наш, давый Откровение великому Иоанну, да уразумеем и мы, имже подобает быти вскоре. Того молитвами спаси мя в день великий гнева Твоего, егда ни горы, ни ущелья, ни камение возмогут укрыти грешники, бежащия от лица Твоего.
Свят еси, Господи, Боже наш, апостолом Твоим Павлом поучаяй, яко аще имам пророчествия и тайны вся и веру, якоже и горы преставляти, любве же не имам, кая ми польза есть? Даждь ми любовь нелицемерну, да тяготу брата моего, якоже и свою, понесу, и душу мою положу за други своя.
Свят еси, Господи, Боже наш, Любы неизреченная, даруй ми возлюбити Тя, якоже иногда возлюбих грех свой, и принеся плоды покаяния, сподоби поработати Тебе, якоже поработах прежде сатане льстивому, да из глубины души воспою:
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Буря велия, разрушающая горы, предъидяше, трус и мрак, громы и молнии бываху, егда являлся Господь Илии в Хориве и Моисею на Синае; но сей страх малый есть прообраз последняго дне мира, о немже глаголал Господь учеником на горе Елеонстей и Иоанну на Патмосе. Тогда бо вся вселенная сотрясется: огнь, вода и вся стихии смятутся; и свет, и мрак, и кровь, и дым, и трубы Ангельския, и мертвецев востание, и вопль людей соединятся, возвещая Второе пришествие и Страшный Суд Его, и час отмщения. О, ужаснаго зрелища и испытания! Невозможно есть нам и изобразити сие: горе — грешным, и слава — праведным тогда. Милосерде Господи! Спаси мя тогда, молюся, да пою Ти: Аллилуиа.

Слышах Тя, Господи, усты Петровы глаголюща: яко нынешняя небеса и нынешняя земля Словом Твоим содержимы и огню блюдомы на День Суда и погибели нечестивых человек, аз содрогаюся, но на неизреченное милосердие Твое дерзая, новаго небеси и новыя земли по неложному Твоему обетованию чаю, в них же вся правда живет. Сия убо желанныя земли жителя мя сотвори тогда, Спасе, зовуща:
Свят еси, Господи, Боже наш, неизследимый и непременимый вчера и днесь и во веки Той же еси, и лета Твоя не оскудеют; имеяй небеса и землю, яко ризу ветху сняти, в ризу нову и нетленну облецы мя.
Свят еси, Господи, Боже наш, стояй у двери и стучаяй, и к слышащему глас Твой, и двери сердца отверзающему — входящий к нему и свечеряющий с ним. Вниди в дом смиренныя и грешныя души моея и свечеряй со мною, якоже с Лукою и Клеопою, ибо преклонился уже есть день жизни моея.
Свят еси, Господи, Боже наш, Путь, Истина и Живот мой, настави мя на путь Твой, и пойду во истине Твоей.
Свят еси, Господи, Боже наш, рекий древле: Марфо, Марфо, печешися и молвиши о мнозе, едино же есть на потребу, — даждь и ми ни о едином земном пещися, но и о небесном помышляти.
Свят еси, Господи, Боже наш, рекий богатому: безумне! В сию же нощь душу твою истяжут от Тебе, а еже уготовал еси кому будет? Помози ми сокровище не земное, а небесное собирати, идеже ни червь, ни тля тлит, ни татие подкапывают и крадут.
Свят еси, Господи, Боже наш, освяти мя во всей полноте Своей, да всесовершен дух мой и душа и тело непорочно в пришествие Твое да сохранятся.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Боже, Боже мой, пришедый взыскати и спасти погибшаго, — призри на скорбь души моея: век бо мой скончавается, и Страшный Твой Престол предуготовляется, житие мое мимоидет, Суд же мне предлежит, грозя мне огненною мукою и пламенем неугасимым. Вонми, убо, молитве моей и не отрини слез моих, яко суетных: кто убо прииде к Тебе плача и не абие спасен бысть? Веру мою вместо дел вмени мне, Господи, и не взыщи дел, отнюдь оправдающих мя, яко тщуся творити тыя, но не имам их; но та вера моя да довлеет вместо всех, та да отвещает, та да оправдит, та да покажет мя причастника славы Твоея вечныя в невечернем дни Царствия Твоего, воспевающа: Аллилуия.

Провидя Даниил пророк, муж желаний, древле ясно Божественное Твое Второе пришествие, Владыко Господи, глагола: дондеже престолы поставишася, и Ветхий денми седе, одежди Его белы, аки снег, и власы главы Его, аки волна, чисты, и Престол Его пламень палящь; река огненная течет исходящи пред Ним; тысяща тысящ служаху Ему, и тмы тем предстояху Ему, на судищи седящему, и книги отверзошася. Пощади убо, пощади, Спасе, тогда Твое создание, слезно вопиющее Ти таковая:
Свят еси, Господи, Боже наш, на Престоле Славы почиваяй, Ему же дадеся власть и честь, и Царство, и вси людие; племена и языцы Тому работают; Его же власть — власть вечная, яже не прейдет, и Царство Его не разсыплется.
Свят еси, Господи, Боже наш, Великий и Страшный, Его же Даниил пророк святый видев, духом вострепета и смутися, — аз же, грешный, како дерзну узрети Тя и отвещати Тебе?
Свят еси, Господи, Боже наш, Боже милости и щедрот и человеколюбия, — молитвами Пророка Твоего избави мя потока страшнаго реки огненныя, хотящаго поглотити мя за грехи моя.
Свят еси, Господи, Боже наш, праведныя любяй и грешныя милуяй, горы мерилом разума поставивый, лик звездам исчитаяй и капли росныя ко ветров дыханию приложивый, — услыши стенание души моея, и вопль сердца моего к Тебе да приидет.
Свят еси, Господи, Боже наш, Сердцеведче, Ему же вся, не токмо словеса, но чувствия и помышления содеянныя и несодеянныя наша ведомы суть, — не осуди мя по благости Твоей за всякое слово праздное и помыслы скверныя, яже аз изрекох и помыслих в житии моем.
Свят еси, Господи, Боже наш, продолжи ми век к покаянию и на посечение со смоковницею безплодною не осуди мене.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Проповедник Твой, Господи, духоносный Иоанн Богослов, видев во откровении славный Престол Небесный и под Престолом души убиенных за слово Божие, от великия скорби пришедших, иже и возопиша велегласно глаголюще: доколе, Владыко Святый и Истинный, не осудиши и не отмстиши за кровь нашу живущим на земли? и даны быша коемуждо им ризы белы, и заповедано бысть им пождати еще время мало, дондеже скончаются соратницы их, подобно им имущия избиены быти, яко да восполнится предопределенное число. О, великаго и неизреченнаго долготерпения Твоего, Владыко! Яко и до сего дне отмщение нечестивым отлагаеши. Но горе миру, егда Судия внезапу приидет и коегождо деяния обнажатся, тогда погибнут грешницы от лица Божия, а праведницы возвеселятся и возрадуются пред Богом во веки зовуще Ему: Аллилуия.

Возсиял еси на Фаворе, Христе Боже наш, и ученицы Твоя, елика вмещаху, славу Твою видеша; но и убояшася, и вострепеташа, и ниц падоша. С тою же неизреченною, но пребольшею всею славою приидеши на облацех в день он судити живых и мертвых, и явиши знамение великое, иже есть Крест Твой Честный, от конец земли и до конец небес простираяйся; егоже узревше, восплачут вся колена земная, ибо страх явления Лица Твоего земнородным страшнее по премногу есть всякаго в мире сем разрушения и пременения. Како срету Тя тогда, Боже мой, кий плач и ответ воздам Ти, не могий, бедный, вместити и иоты славы Твоея. Но на Твое несказанное милосердие уповая, всякий грех истинно кающагося побеждающее, дерзаю прежде конца возопити Ти:
Свят еси, Господи, Боже наш, во свете живый неприступнем, — осени мя, грешнаго, светом Лица Твоего, и не опали огнем Божества Твоего, егда приидеши во Славе святей Своей.
Свят еси, Господи, Боже наш, даяй знамения на небеси и на земли, посылаяй огнь, язву и глад на люди за множество беззаконий их, — сохрани мя от язв будущих и от чаши гнева Твоего проклятия, приключитися имущих в последнии дни мира сего.
Свят еси, Господи, Боже наш, Слове необыменный, даруй ми слово благо отвещати на Страшнем Суде Твоем.
Свят еси, Господи, Боже наш, глаголяй: побеждаяй наследит вся, и буду Ему Бог, и той мне будет в сына, — помози мне греха победителем явитися.
Свят еси, Господи, Боже наш, рекий: яко страшливых и неверных, скверных, убийц и блудодейц, идолослужителей и всех лживых часть в езере, горящем огнем и серою, ожидает, — спаси и избави мя от части тоя.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Хотящу Ти, о, Преблагословенный Господи Иисусе Христе, Боже наш, в день пакибытия, во Второе пришествие, явитися миру на облацех яко Судии и Мздовоздаятелю, — о, каковый Страшный Суд будет тогда, Ангелом во тьмах и тысящах предстоящим, Апостолом председящим, человеком во ужасе вводимым, книгам разгибаемым и делом и помыслом истязуемым? Кий суд будет мне, зачатому во гресех? Кто ми пламень, жгущий мя, угасит? Кто ми тьму просветит? Кто мя тогда защитит, аще не Ты Сам — Любы и Милость безконечная! Молитвами Пречистыя Матери Твоея и Ангела-хранителя моего спаси мя тогда, зовуща: Аллилуия.

Новое и последнее торжество явити сатане льстивому в мире попустивый, Владыко мой Господи, егда пред кончиною века сего открыется человек беззакония, сын погибели, сиречь — антихрист, егоже пришествие со всякою силою и знамениями и чудесы ложными будет; иже, число звериное имеяй, совратит многия люди от пути праваго, и печать свою страшную на тыя положит, гонение на верныя великое воздвигнет и мерзость запустения на месте святе поставит, и три лета с половиною владычествовати будет, егоже и последи убиеши Духом уст Своих. О, горе мне, грешному, в день той тогда! Како спасение обрящу и отцу лжи противостану, когда избранных часть прельстится и праведник едва спасется? Но, о, Премилостиве! Аще и не понесох тяготы и зноя дневнаго, обаче с наемники единонадесятаго часа сопричти мя и веру крепку во дни искушений во мне утверди, да зову Ти таковая:
Свят еси, Господи, Боже наш, по неизреченному промышлению Твоему попустити имеяй в последнии дни воцаритися сыну гордому и погибельному, да верныя прославятся, неверныя же в конец посрамятся.
Свят еси, Господи, Боже наш, два свидетеля тогда с небесе послати имеяй, да избранныя укрепят и антихристу окаяннному противостанут, и истину Твою смертию своею засвидетельствуют.
Свят еси, Господи, Боже наш, прежде всех предрекий нам сия, быти подобающая, да зрим и не ужасаемся, и, избранных ради, сократити дни оныя хотяй.
Свят еси, Господи, Боже наш, в терпении души нам стяжати заповедавый и до конца сия претерпевшему спасение обещавый, — посли и мне дух кротости и терпения с упованием перенести напасти тыя.
Свят еси, Господи, Боже наш, изми мя тогда от сетей лукавого века сего и печати антихристовы избави мя.
Свят еси, Господи, Боже наш, сохрани мя в малом стаде Твоем, имже дати Царство благоволил еси.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Страннаго и страшнаго Втораго Твоего, Господи, пришествия помышляя сретение, трепещу, прещения Твоего боюся и гнева Твоего. Егда приидиши грешныя мучити, праведныя же спасти, — плачу и рыдаю, день оный воспоминая, и молю Тя прежде сего: Спасе мой, спаси мя! Да не прииду тогда в землю плача, да не вижду места тьмы, Христе Спасе мой! Ниже связан буду рукама и ногама вне чертога Твоего изверженный, одежду нетления имый оскверненную и не могий проглаголати, якоже глаголю Ти ныне: Аллилуиа.

Весь еси желание и сладость моя, Сладчайший Господи Иисусе, Упование всех концев земли. Поучаеши ныне о дне славнаго пришествия Твоего, глаголя: бдите и молитеся, не весте бо дне и часа, воньже Сын Человеческий приидет. Сие же ведите: яко аще ведал бы домовладыка, в кую стражу нощи тать приидет — бдел бых убо и не бы дал подкопати храма своего; сего ради и вы будите готови. Внимая убо сему словеси Твоему, благодарне взываю Ти:
Свят еси, Господи, Боже наш, на всякое время и на всякий час бдети и ожидати дне великаго пришествия Твоего верным повелевый.
Свят еси, Господи, Боже наш, о дне том и часе никому не открывый: ни людем праведным, ниже Ангелом Своим. Но якоже молния исходит от восток и является до запад, тако пришествие Свое, имущее быти яве и внезапу, изобразивый.
Свят еси, Господи, Боже наш, обновивый водою во дни Ноя мир, грехами растлевший, егда внезапу потопи люди нечестивыя, ныне же огнем попалити хотяй землю беззаконную с человеки неверными.
Свят еси, Господи, Боже наш, правы пути Твоя и словеса Твоя истинны и непреложны и не мимо идут они, аще небо и земля прейдут.
Свят еси, Господи, Боже наш, не даждь ми отягчити сердце мое объядением, пиянством и печальми житейскими, или иным непотребством, да не внезапу найдет на мя день той.
Свят еси, Господи, Боже наш, рекий: яко на Святаго Духа хулившему не оставится ни в сем веце, ни в будущем, — соблюди мя не износити хулу ни словесную, ни мысленную на имя Святое Твое.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Все естество земных и преисподних ужасом многим содрогнется, и Силы Небесныя подвигнутся в той час, егда солнце померкнет, луна не даст света своего и звезды спадут с небес; небеса же с шумом мимо идут земли, пламенем горящей, и человеком, рыдающим, и ко Владыце всяческих, к Богу Страшному, со трепетом вопиющим: Аллилуиа.

Витии мира безумствуют, якоже и во дни Давида царя глаголюще: несть Бог, не видим Его! О, слепии! Почто не помышляете, яко неверием окамененнаго сердца своего себе огнь вечный готовите, и богоотступлением и прочими беззакониями кончину мира приближаете? Не слышасте ли из Писаний: яко невидимая Его от создания мира твореньми помышляема, видима суть: и присносущная сила Его и Божество. Очистите, убо, сердца своя и Бога узрите. Но пощади, Господи, от таковаго ожесточеннаго заблуждения и неверия ум, сердце и душу мою, да с верою, упованием и любовию образ пришествия Твоего всегда себе представляю и зову Ти:
Свят еси, Господи, Боже наш, праведным судом Твоим всем нам в землю, от неяже взяты есмы, возвратитися повелевый и паки в день всеобщаго Воскресения из нея востати положивый.
Свят еси, Господи, Боже наш, солнцу, луне и звездам некогда померкнути, а земли и всему, яже на ней, огнем преобразитися предопределивый, да вместо их явится небо ново и земля нова, в нихже правда живет.
Свят еси, Господи, Боже наш, утаивый день, в оньже предстанут на суд вся племена и языцы, да восприимет кийждо по делом своим.
Свят еси, Господи, Боже наш, Пастырю добрый и Судие Праведнейший, имеяй сести в день воздаяния Твоего на Престоле разсуждения, во еже разлучити же вся народы друг от друга, якоже пастырь разлучает овцы от козлищ; да поставиши овцы одесную себе, а козлища ошуюю, и речеши праведным сладкий глас: приидите, благословеннии Отца Моего, и наследуйте Царствие, уготованное вам от сложения мира.
Свят еси, Господи, Боже наш, от Него же нераскаянные грешницы услышат тогда со страхом: отъидите от Мене, проклятии, во огнь вечный, уготованный диаволу и аггелом его.
Свят еси, Господи, Боже наш, обещавый Церковь Свою до конца мира непоколебиму соблюсти, во еже неодоленней быти ей от всех врат адовых.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Спасти хотя древле Лота праведнаго от запаления с содомлянами нечестивыми, Владыко Господи, извел еси его вон из града и рекл еси рабу Своему Аврааму: яко аще бы и десять праведник имел град сей, не бы тогда погибл бысть, но оскудения ради святых в нем и мерзости грешных огню предается. Последи же и учеником Своим в притче плевел сельных глаголал еси, яко плевелы и пшеница обоя купно имут расти до жатвы, да никогда прежде жатвы восторгающе плевелы восторгнется купно с ними и пшеница. От сего убо и назидаемся: яко токмо праведники Твоими мир сей стоит доселе, и ради святых Твоих, в мире живущих, даеши еще время и мне, грешному, покаятися, сего ради, неизследиме Боже, благодарно вопию Ти: Аллилуиа.

Царю царей, Господи Спасе, Агнче непорочный, на Престоле Славы седяй, яко лев, от колена Иудова и корене Давидова возсиявый и мир победивый. Ты един достоин еси разгнути Книгу Жизни великую и разрешити печати ея! Ты, яко Агнец закланный, достоин еси прияти силу, богатство и премудрость, крепость и честь, и славу, и благоволение — ихже воспевают Ти чины Ангельстии и дуси праведных на небеси. Сподоби убо и мя, недостойнаго, с ними славити Тя в день великий и в сей час звати тако:
Свят еси, Господи, Боже наш, Содетелю и Промыслителю наш, сияяй светом солнечным и одождяй на добрыя и злыя; наказуяй и милуяй, нарицаяй не сущая, яко сущая; низводяй даже до ада и паки возводяй.
Свят еси, Господи, Боже наш, имеяй праведники просияти, яко солнце во Царствии Своем, — не погуби мя ради святых Твоих, но в Книзе Животней напиши мя и имя Твое начертай на челе моем.
Свят еси, Господи, Боже наш, день весь жития моего совершен, свят, мирен и безгрешен даруй ми.
Свят еси, Господи, Боже наш, Ангела мирна, верна наставника и хранителя души и тела моего на всяко время неотлучна посли ми.
Свят еси, Господи, Боже наш, по благодати Твоей, изобильно на ны излиянной, презри моя прегрешения и подаждь вся добрая и полезная души моей.
Свят еси, Господи, Боже наш, прочее время живота моего сподоби мя в мире и покаянии скончати, ожидающу дне славнаго явления Твоего.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Пение всеумиленное приношу Ти, Господи, Спасе и Содетелю мой, и молю Тя, егда приидеши судити миру всему на облацех, не постыди мя, студныя дела сотворшаго, и не погуби мя, якоже погубил еси Вавилон — великую блудницу, но, веры ради моея и любве к Тебе, жителя Сиона Горняго соделай мя, идеже есть глас велий народа многаго, яко глас вод многих и яко глас грома крепкаго, глаголющих: Аллилуиа.

Светильник мой угасе, елея же благих дел, во еже возжещи той, несть ми; и где обрящуся окаянный, сном греховным отягченный, егда постигнет мя внезапу полунощь — час кончины моея, или Суд Божий, яко тать найдет на вся живущая на земли? Но да не услышу аз, якоже юродивыя девы, грознаго гласа Жениха: не вем тя. Помози ми, о, Господи, наполнити сосуды души моея елеем благих дел, паче же милосердия и смирения, и звати Ти:
Свят еси, Господи, Боже наш, даждь ми послужити меньшей братии Твоей, якоже Самому Тебе: алчущии и жаждущии насытити, странныя приютити, нагия одеяти, больныя и в темницех страждущия посещати, да сподоблюся части десныя стояния на Суде Твоем.
Свят еси, Господи, Боже наш, отъими от мене дух гордости, праздности и уныния бесовскаго и подаждь ми дух смиренномудрия, целомудрия, кротости и радости духовныя.
Свят еси, Господи, Боже наш, вложи в мысль мою мудрость сына Сирахова: помнити последняя моя, дабы во веки не согрешити.
Свят еси, Господи, Боже наш, Женише, красный добротою паче всех человек, грядый в полунощи, — с мудрыми девами в рай введи мя.
Свят еси, Господи, Боже наш, приими мольбу о нас и предстательство всех святых Твоих паче же простирающую к Тебе всегда о нас руце Своя Деву Пречистую, Тебе рождшую.
Свят еси, Господи, Боже наш, огради нас святыми Твоими Ангелы и отжени от нас духов злобы поднебесных.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Благодать Твою, Господи Боже наш, грешныя милующую, сведуще, аще и недостойное житие явихом; обаче надежду Воскресения и жизни вечныя имуще, христианския кончины живота нашего, безболезнены, непостыдны, мирны, Божественных Таин причастны, и добраго ответа на Страшнем Судищи Твоем всегда просим, во умилении зовуще: Аллилуиа.

Поюще Твое непостижимое о людех и о мире, Тобою сотворенном, промышление, Вседержителю Отче, Сыне и Душе, Господи наш, славлю Тя, создание и раб Твой, и, яко чадо Церкве Православныя, чаю Воскресения мертвых и жизни будущаго века; в веце же настоящем молю Тя, Блаже: избави мя искушений, от мира, плоти и диавола находящих на мя, и укрепи в вере несумненней и любви к Тебе; да благочестне, чисто и свято прочее время живота поживу и сподоблюся части правыя в день пакибытия, зовуща Ти:
Свят еси, Господи, Боже наш, Мздовоздаятелю Праведный, судити имеяй на велицем Престоле Своем, от Егоже Лица побегнут небо и земля, и место их не обретется.
Свят еси, Господи, Боже наш, всем нам явитися пред Судище Твое положивый, да воздаши коемуждо яже с телом содела: благая или злая; еже предопределил еси мне прежде дне того скончатися, — даждь ми безбедно прейти мытарства воздушныя бесовския и оправдатися на первом, частном, суде Твоем.
Свят еси, Господи, Боже наш, сатану и аггелы его, зверя и лжепророка во езеро огненное на мучения вечныя Архангелом Твоим Михаилом ввергнути имеяй; того предстательством избави мя муки страшныя, тартара и тьмы кромешныя и геенны огненныя, идеже червь не умирает и огнь не угасает.
Свят еси, Господи, Боже наш, всех Твоих ради святых, изряднее же святых Твоих щедрот и Крове Твоея, за ны пролиянныя, жителя мя сотвори Иерусалима Небеснаго, идеже несть ни смерти, ни плача, ни вопля, ни болезни, ни скверны некия, но жизнь безконечная, и слава Твоя присно осеняет его.
Свят еси, Господи, Боже наш, прежде сих всех помози ми соблюдати словеса евангельския, творити волю Твою и прилежно внимати пророчеству Откровения Иоаннова, яко время близ есть.
Свят еси, Господи, Боже наш, рекий в конец Богослову: яко, дондеже суд приидет, скверный — да сквернится еще, а святый — да святится еще. Ей, гряду скоро, и мзда Моя со Мною есть. Аминь! Ей, гряди, Господи Иисусе, молит Тя Церковь Твоя, зовущи:
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

О Великий и Непостижимый Боже! Альфа и Омега, начало и конец всему сущему, Иже вчера, днесь и во веки Той же, и у Него же несть пременения, Егоже и лета не оскудеют. Приими сие малое акафистное моление мое в память грядущаго и Страшнаго Суда Твоего, всегда мною Тебе приносимое, и, по множеству щедрот Твоих, очисти беззакония моя, и имя мое в Книзе Живота напиши, и в юдоль плача не осуди, егда судити сядеши; и от пресветлаго лица Твоего не отлучи мене. Да егда скончаются дни века сего, и небеса и земля сия мимо идут, и светила, яко воск истаят, тогда, о, Всемилостиве, да узрю и аз стены Горняго Иерусалима, и купно со избранными десными Твоими овцами вниду во святый град сей и тамо насыщуся славы Твоея и буду пети Ти песнь нову во вся веки веков: Аллилуиа.
Сей кондак читается трижды, таже:

Архангельския трубы возглашение, на Суд Господень Страшный и Последний, живыя и мертвыя от всех конец земли собирающее, уже во ушесех предносится. Душе моя, душе моя, востани, что спиши? Конец приближается, и имаши смутитися. Воспряни убо, яко мало есть еще время на покаяние; бодрствуй, молися и трезвися и дела добрая твори, непрестанно вопиющи ко Владыце своему таковая:
Свят еси, Господи, Боже наш, и Пресвят, и да святится и в сем грешном и во зле лежащем мире имя Твое, паче всякаго имене.
Свят еси, Господи, Боже наш, да приидет Твое славное Царствие.
Свят еси, Господи, Боже наш, да будет во всем воля Твоя святая на земли, якоже пребывает и на небеси.
Свят еси, Господи, Боже наш, хлеб земный насущный даяй нам, паче же небесный даждь ми на всяк день.
Свят еси, Господи, Боже наш, остави ми согрешения моя, якоже и аз оставляю брату своему согрешения его.
Свят еси, Господи, Боже наш, не введи мя в напасть, но избави мя от сетей лукаваго миродержителя тьмы века сего, ибо поистине опасно ходим и дние наша лукави суть.
Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Предвечный Царю веков, Творче и Господи, Судие Праведнейший и нелицеприятный, множество содеянных мною лютых помышляя, окаянный аз, трепещу Страшнаго Дне Суднаго, но, надеяся на милость неизреченнаго благоутробия Твоего, давидски молю Тя: по велицей Твоей милости прости мя недостойнаго, и не осуди мя по деянием моим, яко да благою совестию очищен, на всяк день и час Ангельскую песнь приношу Ти: Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Прокимен, глас 7:

Господи, да не яростию Твоею обличиши мене, ниже гневом Твоим накажеши мене.
Стих: Услыши, Боже, глас мой, внегда молити ми ся к Тебе.
Евангелие от Матфея, зачало 106, глава 25, стихи 31-46.
Слава: Молитвами Апостолов, Милостиве, очисти множество согрешений наших.
И ныне: Молитвами Богородицы, Милостиве, очисти множество согрешений наших.
Помилуй мя, Боже, по велицей милости Твоей, и по множеству щедрот Твоих очисти беззаконие мое.

Стихира, глас 6:

Возгласят трубы, и истощатся гробы, и воскреснет человеческое все естество трепещущее, добрая содеявшии, в радости радуются, чающе мзду восприяти: согрешившии же трепещут, люте рыдающе, в муку посылаеми, и от избранных разлучаеми. Господи Славы, ущедри нас яко благий, и части сподоби возлюбивших Тя.

Диакон: Господу помолимся.

Лик: Господи помилуй.

И чтем молитву сию:

Яко на Страшнем Твоем, и нелицеприемнем предстояй Судилищи, Христе Боже, и осуждения подъемля, и слово творя о содеянных мною злых: сице днесь, прежде даже не приити дневи осуждения моего, у святаго Твоего Жертвенника предстоя пред Тобою, и пред страшными и святыми Ангелы Твоими, преклонен от своея совести, приношу лукавая моя и беззаконная деяния, являяй сия и обличаяй. Виждь, Господи, смирение мое, и остави вся грехи моя, виждь яко умножишася паче влас главы моея беззакония моя. Кое убо не содеях зло? Кий грех не сотворих? Кое зло не вообразих в души моей? Всякое мое чувство и всякий уд оскверних, растлих, непотребен сотворих, делателище быв всячески диаволе. И вем, Господи, яко беззакония моя превзыдоша главу мою. Но безмерно есть множество щедрот Твоих, и милость неизреченна незлобивыя Твоея благости, и несть грех, побеждающь человеколюбие Твое. Темже, Пречудный Царю, незлобиве Господи, удиви и на мне, грешнем, милости Твоя, покажи благости Твоея силу и яви крепость благоутробнаго милосердия Твоего, и обращающася приими мя, грешнаго. Приими мя, якоже приял еси блуднаго, разбойника, блудницу. Приими мя, пребезмерне и словом, и делом, и похотию безместною, и помышлением безсловесным согрешивша Тебе. И якоже во единонадесятый час пришедших приял еси, ничтоже достойно соделавших, тако приими и мене, грешнаго: много бо согреших, и осквернихся, и опечалих Духа Твоего Святаго, и огорчих человеколюбную утробу Твою, и делом, и словом, и помышлением, в нощи и во дни, явленне же и неявленне, волею же и неволею. И вем, яко представиши грехи моя предо мною таковы, яковы же мною содеяшася, и истяжеши слово со мною, о ихже разумом непрощенно согреших. Но, Господи, Господи, да не праведным судом Твоим, ниже яростию Твоею обличиши мя, ниже гневом Твоим накажеши мя. Помилуй мя, Господи, яко не токмо немощен есмь, но и Твое есмь создание. Ты убо, Господи, утвердил еси на мне страх Твой, аз же лукавое пред Тобою сотворих, Тебе убо единому согреших. Но молю Тя, не вниди в суд с рабом Твоим. Аще бо беззакония назриши, Господи, Господи, кто постоит? Аз бо есмь пучина греха и несмь достоин, ниже доволен воззрети и видети на высоту небесную от множества грехов моих, ихже несть числа. Киими бо не растлихся грехи? Киими не содержахся злыми? Всяк грех содеях, всякую нечистоту вложих в душу мою: непотребен бых Тебе, Богу моему, и человеком. Кто возставит мя, в сицевая злая и толикая падшаго согрешения? Господи Боже мой, на Тя уповах: аще есть ми спасения упование, аще побеждает человеколюбие Твое множества беззаконий моих, буди ми Спаситель, и по щедротам Твоим и милостем Твоим, ослаби, остави, прости ми вся, елика Ти согреших, яко многих зол исполнися душа моя, и несть во мне спасения надежды. Помилуй мя, Боже, по велицей милости Твоей, и не воздаждь ми по делом моим, и не осуди мя по деянием моим, но обрати, заступи, избави душу мою от совозрастающих ей зол и лютых восприятий. Спаси мя ради милости Твоея: да идеже умножится грех, преизобилует благодать Твоя. Даруй ми слезы сокрушения и умиления сердечнаго, возводящая падшия ко своему наследию, ими же очищуся от всякаго греха, ибо страшно и грозно место имам проити, тела разлучився: множество тогда, мрачное и безчеловечное демонов срящет мя, и никтоже в помощь спутствуяй или избавляяй, но дела моя осудят мя. Сего ради прежде конца в покаянии приими мя и никогдаже отлучайся мене, раба Твоего, но всегда во мне почивай, не предаждь мене крамоле змиине и желанию сатанину не остави мене, яко семя тли во мне есть. Ты убо, Господи Боже покланяемый, Царю Святый, Иисусе Христе, сохрани мя Духом Твоим Святым, Имже освятил еси Твоя ученики. Даждь, Господи, и мне, недостойному рабу Твоему, спасение Твое: ум мой светом разумения Святаго Евангелия Твоего просвети, душу любовию Креста Твоего озари, сердце чистотою словесе Твоего убели, тело мое Твоею страстию безстрастною исцели, мысль мою Твоим смирением сохрани, и воздвигни мя к деланию заповедей Твоих, и даруй ми бодренным сердцем и трезвенной мыслию всю настоящаго жития нощь прейти, ожидающему пришествия светлаго и явленнаго дне Твоего. Ты убо еси, Господи, Свет, паче всякаго света, Радость, паче всякия радости, Упование, паче всякаго упования, Жизнь истинная и Спасение, пребывающее во веки веков. Аминь!

Ирмос: От Иудеи дошедше отроцы, / в Вавилоне иногда, / верою Троическою пламень пещный попраша, поюще: / отцев Боже, благословен еси.
Не надейся, душе моя, / на тленное богатство и на неправедное собрание, / вся бо сия не веси, кому оставиши, / но возопий: помилуй мя, Христе Боже, недостойнаго.
Не уповай, душе моя, / на телесное здравие / и на скоромимоходящую красоту, / видиши бо, яко сильнии и младии умирают; / но возопий: помилуй мя, Христе Боже, недостойнаго.
Слава: Воспомяни, душе моя, вечное житие, / Царство Небесное, уготованное святым, / и тьму кромешную и гнев Божий злым, / и возопий: помилуй мя, Христе Боже, недостойнаго.
И ныне: Припади, душе моя, к Божией Матери и помолися Той, / есть бо скорая помощница кающимся, / умолит Сына Христа Бога, / и помилует мя недостойнаго.

Ирмос: Царя Небеснаго, / Егоже поют вои ангельстии, / хвалите и превозносите во вся веки.
Како не имам плакатися, егда помышляю смерть, / видех бо во гробе лежаща брата моего, / безславна и безобразна? / Что убо чаю, и на что надеюся? / Токмо даждь ми, Господи, прежде конца покаяние. (Дважды)
Слава: Верую, / яко приидеши судити живых и мертвых, / и вси во своем чину станут, / старии и младии, владыки и князи, / девы и священницы; / где обрящуся аз? / Сего ради вопию: / даждь ми, Господи, прежде конца покаяние.
И ныне: Пречистая Богородице, / приими недостойную молитву мою / и сохрани мя от наглыя смерти, / и даруй ми прежде конца покаяние.
Катавасия, таже поем: Честнейшую...

Ирмос: Воистинну Богородицу Тя исповедуем, / спасеннии Тобою, Дево Чистая, / с безплотными лики Тя величающе.
Ныне к вам прибегаю, Ангели, Архангели / и вся Небесныя Силы, / у Престола Божия стоящии, / молитеся ко Творцу своему, / да избавит душу мою от муки вечныя.
Ныне плачуся к вам, / святии патриарси, царие и Пророцы, / Апостоли и святителие / и вси избраннии Христовы: / помозите ми на суде, / да спасет душу мою от силы вражия.
Слава: Ныне к вам воздежу руце, / святии мученицы, / пустынницы, девственницы, / праведницы и вси святии, / молящиися ко Господу за весь мир, / да помилует мя в час смерти моея.
И ныне: Мати Божия, / помози ми, на Тя сильне надеющемуся, / умоли Сына Своего, / да поставит мя недостойнаго одесную Себе, / егда сядет судяй живых и мертвых, аминь.
Таже: Достойно есть... Малая ектения.
И по возгласе стихиры на хвалитех, глас 6:
Стих: Хвалите Его в кимвалех доброгласных, хвалите Его в кимвалех восклицания. Всякое дыхание да хвалит Господа.
Помышляю день оный и час, егда имамы вси нази и яко осуждени, неумытному Судии предстати, тогда труба возшумит вельми, и основания земли подвижатся, и мертвии от гробов воскреснут, и возрастом единем вси будут, и всех тайная явленна предстанут пред Тобою и возрыдают, и восплачутся, и во огнь кромешный отъидут, иже николиже покаяшася: и в радость и веселие праведных жребий внидет в чертог небесный.
Стих: Исповемся Тебе, Господи, всем сердцем моим, повем вся чудеса Твоя.
Даниил пророк, муж желаний быв, властительное Божие видев, сице вопияше: Судия седе и книги разгнушася. Блюди, душе моя, постиши ли ся? ближняго твоего не презри; от брашен воздержиши ли ся? брата твоего не осуждай, да не в огнь отсылаема сгориши, яко воск, но да без преткновения ведет тя Христос в Царствие Свое.

Слава, и ныне, глас 8:

Егда поставятся престоли и отверзутся книги, и Бог на Суде сядет, о кий страх тогда Ангелом, предстоящим в страсе, и реце огненней влекущей! Что сотворим тогда, во многих гресех повиннии человецы? Егда же услышим зовуща Его благословенныя Отца в Царство, грешныя же отсылающа в муку, кто потерпит страшнаго онаго изречения? Но, едине Человеколюбче Спасе, Царю веков, прежде даже кончина не приспеет, покаянием обратив, помилуй мя.
Славословие великое и отпуст.

Акафист, найден в бумагах блаженного старца Севастиана Карагандинского при подготовке материалов к его канонизации.
Предполагается, что привезен был он кем-то из русского духовенства, проживавшего после прихода к власти в России большевиков в Шанхае и вынужденного оставить город во время революционных событий в самом Китае. Преподобный Севастиан читал его сам и благословлял читать своим духовным чадам.
Этот акафист получил большое распространение — по месту обретения своего — в Алма-Атинской епархии: последование «Молебного пения с акафистом умилительным Господу Иисусу Христу, Праведнейшему Судии и Мздовоздаятелю нашему, в память всеобщего Воскресения и Страшного Суда» совершается как в городском кафедральном соборе Алма-Аты, так и во многих приходских церквях.

Кондак 1
Предвечный Царю веков, Творче и Господи, Судие Праведнейший и нелицеприятный, множество содеянных мною лютых помышляя, окаянный аз, трепещу Страшнаго Дне Суднаго, но, надеяся на милость неизреченнаго благоутробия Твоего, давидски молю Тя: по велицей Твоей милости прости мя недостойнаго, и не осуди мя по деянием моим, яко да благою совестию очищен, на всяк день и час Ангельскую песнь приношу Ти: Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Икос 1
Архангельския трубы возглашение, на Суд Господень Страшный и Последний, живыя и мертвыя от всех конец земли собирающее, уже во ушесех предносится. Душе моя, душе моя, востани, что спиши? Конец приближается, и имаши смутитися. Воспряни убо, яко мало есть еще время на покаяние; бодрствуй, молися и трезвися и дела добрая твори, непрестанно вопиющи ко Владыце своему таковая: Свят еси, Господи, Боже наш, и Пресвят, и да святится и в сем грешном и во зле лежащем мире имя Твое, паче всякаго имене. Свят еси, Господи, Боже наш, да приидет Твое славное Царствие. Свят еси, Господи, Боже наш, да будет во всем воля Твоя святая на земли, якоже пребывает и на небеси. Свят еси, Господи, Боже наш, хлеб земный насущный даяй нам, паче же небесный даждь ми на всяк день. Свят еси, Господи, Боже наш, остави ми согрешения моя, якоже и аз оставляю брату своему согрешения его. Свят еси, Господи, Боже наш, не введи мя в напасть, но избави мя от сетей лукаваго миродержителя тьмы века сего, ибо поистине опасно ходим и дние наша лукави суть. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 2
Вижду, Господи мой, Господи, яко вся знамения кончины века сего уже исполняются: вера святая в людех оскуде, беззакония умножишася, и любовь охладе; востают бо народ на народ, царство на царство, отец на сына и сын на отца, глады и трусы и пагубы изобилуют по местом, прельстители и предатели явишася, и гонения на верных Твоих воздвигошася, таже и проповедание Евангелия во свидетельство всем языком уже совершается, и скорбь великая посреди верных по вселенней распространяется, и по сих всех, разумея, яко близ есть кончина века сего, со страхом вопию Ти: Аллилуиа.

Икос 2
Разум неуразуменный времени страшнаго и неизглаголаннаго пришествия Твоего открыти верным хотя, Всеблагий Господи, дал еси нам в подобие того притчу смоковницы, глаголя: егда бо ваия ея будут млади и листвие прозябнет, ведите, яко близ есть лето. Тако и вы, егда видите сия вся, - бодрствуйте, яко близ есть, при дверех. Тем же и мы, пришед на конец веков, со умилением зовем Ти: Свят еси, Господи, Боже наш, притчами тайноводя нас во Царствие Свое, да всяк имеяй уши духовныя слышати, да слышит, даруй и мне уразумение Твоего евангельскаго проповедания, да плотския похоти попраше, духовно жительствую и к жатве всемирной уготовляюся. Свят еси, Господи, Боже наш, притчею жерновною поучай нас, яко от двоих, вкупе труждающихся и живущих, в той день един поемлется и един оставляется, - не остави мене тогда со грешники, делающими беззаконие, но очищение даруй и введи во Твое славное Царствие. Свят еси, Господи, Боже наш, глаголяй: молитеся, да не будет бегство ваше в зиме или в субботу, о веце кончины мира, яко о зиме гадательствуя; даждь ми, в сие осьмое тысячелетие живущему, стопы моя к бегству великому в сретение Твое уготовати и непрестанно помышляти грядущее помози ми. Свят еси, Господи, Боже наш, рекий: в чем застану, в том и сужду, - возбуди мя, множицею во грехи впадающа, к частому покаянию, да не обрящеши, пришед, мя неготоваго. Свят еси, Господи, Боже наш, Праведный и Милостивый, не вниди в суд с рабом Твоим, яко не оправдится пред Тобою всяк живый, - от лица же Твоего судьба моя изыдет. Свят еси, Господи, Боже наш, рекий: не всяк глаголяй Ми: Господи, Господи, внидет в Царствие Небесное, но творяй волю Отца Моего, - научи мя творити волю Твою. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 3
Силою Божества Твоего, Господи, воздвигл еси из гроба Лазаря, бездыханна четверодневна, и телеса усопших святых в час смерти и крестных страданий Твоих возставил еси; последи же и Сам тридневен воскресл еси от мертвых тою же силою Твоею. Веруем, яко грядет час и ныне уже есть, егда по гласу Твоему воскреснут мертвии, и востанут сущии во гробех, и изыдут сотворшии благая в воскрешение живота, а сотворшии злая в воскрешение суда. Не осуди тогда и мя, Владыко, по деянием моим, но помилуй со всеми в вере и надежде жизни вечныя усопшими, и пети не возбрани: Аллилуиа.

Икос 3
Имеяй ключи ада и смерти, аще и глаголал еси, Господи, верному рабу Твоему Иоанну тайновидцу, стоявшему посреде седми светильников: Аз есмь Первый и Последний, и живый, и бых мертв, и се жив есмь во веки веков, аминь, - повелел же еси ему написати имже подобает быти вскоре. Сия страшная и близкая скончания мира сего быти помышляя, не с суетным любопытством, но со страхом и трепетом взываю Ти: Свят еси, Господи, Боже наш, Свидетелю верный, Первенец из мертвых, и Княже царей земных; любяй ны и омываяй ны от грех наших Кровию Своею, и ключи Царствия Небеснаго человеком вручивый, - укрепи мя в вере Твоей, да николиже отрекуся Тебе, но, аще понудитися, до крове постою за имя святое Твое. Свят еси, Господи, Боже наш, грядый на облацех небесных, да узрят Его всяко око и иже прободоша Его, и плачь сотворят о Нем тогда вся колена земная, - даруй и мне прежде дне того страшнаго плачь за грехи моя. Свят еси, Господи, Боже наш - Альфа и Омега, начало и конец, Первый и Последний - скажи ми кончину мою и число дней моих возвести ми. Свят еси, Господи, Боже наш, давый Откровение великому Иоанну, да уразумеем и мы, имже подобает быти вскоре. Того молитвами спаси мя в день великий гнева Твоего, егда ни горы, ни ущелья, ни камение возмогут укрыти грешники, бежащия от лица Твоего. Свят еси, Господи, Боже наш, апостолом Твоим Павлом поучаяй, яко аще имам пророчествия и тайны вся и веру, якоже и горы преставляти, любве же не имам, кая ми польза есть? Даждь ми любовь нелицемерну, да тяготу брата моего, якоже и свою, понесу, и душу мою положу за други своя. Свят еси, Господи, Боже наш, Любы неизреченная, даруй ми возлюбити Тя, якоже иногда возлюбих грех свой, и принеся плоды покаяния, сподоби поработати Тебе, якоже поработах прежде сатане льстивому, да из глубины души воспою: Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 4
Буря велия, разрушающая горы, предъидяще, трус и мрак, громы и молнии бываху, егда являлся Господь Илии в Хориве и Моисею на Синае; но сей страх малый есть прообраз последняго дне мира, о немже глаголал Господь учеником на горе Елеонстей и Иоанну на Патмосе. Тогда бо вся вселенная сотрясется: и огнь, вода и вся стихии смятутся; и свет, и мрак, и кровь, и дым, и трубы Ангельския, и мертвецев востание и вопль людей соединятся, возвещая Второе пришествие и Страшный Суд Его, и час отмщения. О, ужаснаго зрелища и испытания! Невозможно есть нам и изобразити сие: горе - грешным, и слава - праведным тогда. Милосерде Господи! Спаси мя тогда, молюся, да пою Ти: Аллилуиа.

Икос 4
Слышах Тя, Господи, усты Петровы глаголюща: яко нынешняя небеса и нынешняя земля Словом Твоим содержимы и огню блюдомы на День Суда и погибели нечестивых человек, аз содрогаюся, но на неизреченное милосердие Твое дерзая, новаго небеси и новыя земли по неложному Твоему обетованию чаю, в них же вся правда живет. Сия убо желанныя земли жителя мя сотвори тогда, Спасе, зовуща: Свят еси, Господи, Боже наш, неизследимый и непременимый вчера и днесь, и во веки Той же еси, и лета Твоя не оскудеют; имеяй небеса и землю, яко ризу ветху сняти, в ризу нову и нетлену облецы мя. Свят еси, Господи, Боже наш, стояй у двери и стучаяй, и к слышащему глас Твой, и двери сердца отверзающему - входящий к нему и свечеряющий с ним. Вниди в дом смиренныя и грешныя души моея и свечеряй со мною, якоже с Лукою и Клеопою, ибо преклонился уже есть день жизни моея. Свят еси, Господи, Боже наш, Путь, Истина и Живот мой, настави мя на путь Твой, и пойду во истине Твоей. Свят еси, Господи, Боже наш, рекий древле: Марфо, Марфо, печешися и молвиши о мнозе, едино же есть на потребу, - даждь и ми ни о едином земном пещися, но и о небесном помышляти. Свят еси, Господи, Боже наш, рекий богатому: безумне! В сию же нощь душу твою истяжут от Тебе, а еже уготовал еси кому будет? Помози ми сокровище не земное, а небесное собирати, идеже ни червь, ни тля тлит, ни татие подкапывают и крадут. Свят еси, Господи, Боже наш, освяти мя во всей полноте Своей, да всесовершен дух мой и душа и тело непорочно в пришествие Твое да сохранятся. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 5
Боже, Боже мой, пришедый взыскати и спасти погибшаго, - призри на скорбь души моея: век бо мой скончавается, и Страшный Твой Престол предуготовляется, житие мое мимоидет, Суд же мне предлежит, грозя мне огненною мукою и пламенем неугасимым. Вонми, убо, молитве моей и не отрини слез моих, яко суетных: кто убо прииде к Тебе плача и не абие спасен бысть? Веру мою вместо дел вмени мне, Господи, и не взыщи дел, отнюдь оправдающих мя, яко тщуся творити тыя, но не имам их; но та вера моя да довлеет вместо всех, та да отвещает, та да оправдит, та да покажет мя причастника славы Твоея вечныя в невечернем дни Царствия Твоего, воспеваюша: Аллилуиа.

Икос 5
Провидя Даниил пророк, муж желаний, древле ясно Божественное Твое Второе пришествие, Владыко Господи, глагола: дондеже престолы поставишася, и Ветхий денми седе, одежди Его белы, аки снег, и власы главы Его, аки волна, чисты, и Престол Его пламень палящь; река огненная течет исходящи пред Ним; тысяща тысящ служаху Ему, и тмы тем предстояху Ему, на судищи седящему, и книги отверзошася. Пощади убо, пощади, Спасе, тогда Твое создание, слезно вопиющее Ти таковая: Свят еси, Господи, Боже наш, на Престоле Славы почиваяй, Ему же дадеся власть и честь, и Царство, и вси людие; племена и языцы Тому работают; Его же власть - власть вечная, яже не прейдет, и Царство Его не разсыплется. Свят еси, Господи, Боже наш, Великий и Страшный, Его же Даниил пророк святый видев, духом вострепета и смутися, - аз же, грешный, како дерзну узрети Тя и отвещати Тебе? Свят еси, Господи, Боже наш, Боже милости и щедрот и человеколюбия, - молитвами Пророка Твоего избави мя потока страшнаго реки огненныя, хотящаго поглотити мя за грехи моя. Свят еси, Господи, Боже наш, праведныя любяй и грешныя милуяй, горы мерилом разума поставивый, лик звездам исчитаяй и капли росныя ко ветров дыханию приложивый, - услыши стенание души моея, и вопль сердца моего к Тебе да приидет. Свят еси, Господи, Боже наш, Сердцеведче, Ему же вся, не токмо словеса, но чувствия и помышления содеянныя и несодеянныя наша ведомы суть, - не осуди мя по благости Твоей за всякое слово праздное и помыслы скверныя, яже аз изрекох и помыслих в житии моем. Свят еси, Господи, Боже наш, продолжи ми век к покаянию и на посечение со смоковницею безплодною не осуди мене. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 6
Проповедник Твой, Господи, духоносный Иоанн Богослов, видев во
откровении славный Престол Небесный и под Престолом души убиенных за слово Божие, от великия скорби пришедших, иже и возопиша велегласно глаголюще: доколе, Владыко Святый и Истинный, не осудиши и не отмстиши за кровь нашу живущим на земли? и даны быша коемуждо им ризы белы, и заповедано бысть им пождати еще время мало, дондеже скончаются соратницы их, подобно им имущия избиены быти, яко да восполнится предопределенное число. О, великаго и неизреченнаго долготерпения Твоего, Владыко! Яко и до сего дне отмщение нечестивым отлагаеши. Но горе миру, егда Судия внезапу приидет и коегождо деяния обнажатся, тогда погибнут грешницы от лица Божия, а праведницы возвеселятся и возрадуются пред Богом во веки зовуще Ему: Аллилуиа.

Икос 6
Возсиял еси на Фаворе, Христе Боже наш, и ученицы Твоя, елика вмещаху, славу Твою видеша; но и убояшася, и вострепеташа, и ниц падоша. С тою же неизреченною, но пребольшою всею славою приидеши на облацех в день он судити живых и мертвых, и явиши знамение великое, иже есть Крест Твой Честный, от конец земли и до конец небес простираяйся; егоже узревше, восплачут вся колена земная, ибо страх явления Лица Твоего земнородным страшнее по премногу есть всякаго в мире сем разрушения и пременения. Како срету Тя тогда, Боже мой, кий плач и ответ воздам Ти, не могий, бедный, вместити и иоты славы Твоея. Но на Твое несказанное милосердие уповая, всякий грех истинно кающагося побеждающее, дерзаю прежде конца возопити Ти: Свят еси, Господи, Боже наш, во свете живый неприступнем, - осени мя, грешнаго, светом Лица Твоего, и не опали огнем Божества Твоего, егда приидеши во Славе святей Своей. Свят еси, Господи, Боже наш, даяй знамения на небеси и на земли, посылаяй огнь, язву и глад на люди за множество беззаконий их, - сохрани мя от язв будущих и от чаши гнева Твоего проклятия, приключитися имущих в последнии дни мира сего. Свят еси, Господи, Боже наш, Слове необыменный, даруй ми слово благо отвещати на Страшнем Суде Твоем. Свят еси, Господи, Боже наш, глаголяй: побеждаяй наследит вся, и буду Ему Бог, и той мне будет в сына, - помози мне греха победителем явитися. Свят еси, Господи, Боже наш, рекий: яко страшливых и неверных, скверных, убийц и блудодейц, идолослужителей и всех лживых часть в озере, горящем огнем и серою, ожидает, - спаси и избави мя от части тоя. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 7
Хотящу Ти, о, Преблагословенный Господи Иисусе Христе, Боже наш, в день пакибытия, во Второе пришествие, явитися миру на облацех яко Судии и Мздовоздаятелю, - о, каковый Страшный Суд будет тогда, Ангелом во тьмах и тысящах предстоящим, Апостолом председящим, человеком во ужасе вводимым, книгам разгибаемым и делом и помыслом истязуемым? Кий суд будет мне, зачатому во гресех? Кто ми пламень, жгущий мя, угасит? Кто ми тьму просветит? Кто мя тогда защитит, аще не Ты Сам - Любы и Милость бесконечная! Молитвами Пречистыя Матери Твоея и Ангела- хранителя моего спаси мя тогда, зовуща: Аллилуиа.

Икос 7
Новое и последнее торжество явити сатане льстивому в мире попустивый, Владыко мой Господи, егда и пред кончиною века сего открыется человек беззакония, сын погибели, сиречь - антихрист, егоже пришествие со всякою силою и знамениями и чудесы ложными будет; иже, число звериное имеяй, совратит многия люди от пути праваго, и печать свою страшную на тыя положит, гонение на верныя великое воздвигнет и мерзость запустения на месте святе поставит, и три лета с половиною владычествовати будет, егоже и последи убиеши Духом уст Своих. О, горе мне, грешному, в день той тогда! Како спасение обрящу и отцу лжи противостану, когда избранных часть прельстится и праведник едва спасется? Но, о, Премилостиве! Аще и не понесох тяготы и зноя дневнаго, обаче с наемники единонадесятаго часа сопричти мя и веру крепку во дни искушений во мне утверди, да зову Ти таковая: Свят еси, Господи, Боже наш, по неизреченному промышлению Твоему попустити имеяй в последнии дни воцаритися сыну гордому и погибельному, да верныя прославятся, неверныя же в конец посрамятся. Свят еси, Господи, Боже наш, два свидетеля тогда с небесе послати имеяй, да избранныя укрепят и антихристу окаяннному противостанут, и истину Твою смертию своею засвидетельствуют. Свят еси, Господи, Боже наш, прежде всех предрекий нам сия, быти подобающая, да зрим и не ужасаемся, и, избранных ради, сократити дни оныя хотяй. Свят еси, Господи, Боже наш, в терпении души нам стяжати заповедавый и до конца сия претерпевшему спасение обещавый, - посли и мне дух кротости и терпения с упованием перенести напасти тыя. Свят еси, Господи, Боже наш, изми мя тогда от сетей лукавого века сего и печати антихристовы избави мя. Свят еси, Господи, Боже наш, сохрани мя в малом стаде Твоем, имже дати Царство благоволил еси. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 8
Страннаго и страшнаго Втораго Твоего, Господи, пришествия помышляя сретение, трепещу, прещения Твоего боюся и гнева Твоего. Егда приидиши грешныя мучити, праведныя же спасти, - плачу и рыдаю, день оный воспоминая, и молю Тя прежде сего: Спасе мой, спаси мя! Да не прииду тогда в землю плача, да не вижду места тьмы, Христе Спасе мой! Ниже связан буду рукама и ногама вне чертога Твоего изверженный, одежду нетления имый оскверненную и не могий проглаголати, якоже глаголю Ти ныне: Аллилуиа.

Икос 8
Весь еси желание и сладость моя, Сладчайший Господи Исусе, Упование всех концев земли. Поучаеши ныне о дне славнаго пришествия Твоего, глаголя: бдите и молитеся, не весте бо дне и часа, воньже Сын Человеческий приидет. Сие же ведите: яко аще ведал бы домовладыка, в кую стражу нощи тать приидет - бдел бых убо и не бы дал подкопати храма своего; сего ради и вы будите готови. Внимая убо сему словеси Твоему, благодарне взываю Ти: Свят еси, Господи, Боже наш, на всякое время и на всякий час бдети и ожидати дне великаго пришествия Твоего верным повелевый. Свят еси, Господи, Боже наш, о дне том и часе никому не открывый: ни людем праведным, ниже Ангелом Своим. Но якоже молния исходит от восток и является до запад, тако пришествие Свое, имущее быти яве и внезапу, изобразивый. Свят еси, Господи, Боже наш, обновивый водою во дни Ноя мир, грехами растлевший, егда внезапу потопи люди нечестивыя, ныне же огнем попалити хотяй землю беззаконную с человеки неверными. Свят еси, Господи, Боже наш, правы пути Твоя и словеса Твоя истинны и непреложны и не мимо идут они, аще небо и земля прейдут. Свят еси, Господи, Боже наш, не даждь ми отягчити сердце мое объядением, пиянством и печальми житейскими, или иным непотребством, да не внезапу найдет на мя день той. Свят еси, Господи, Боже наш, рекий: яко на Святаго Духа хулившему не оставится ни в сем веце, ни в будущем, - соблюди мя не износити хулу ни словесную, ни мысленную на имя Святое Твое. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 9
Все естество земных и преисподних ужасом многим содрогнется, и Силы Небесныя подвигнутся в той час, егда солнце померкнет, луна не даст света своего и звезды спадут с небес; небеса же с шумом мимо идут земли, пламенем горящей, и человеком, рыдающим, и ко Владыце всяческих, к Богу Страшному, со трепетом вопиющим: Аллилуиа.

Икос 9
Витии мира безумствуют, якоже и во дни Давида царя глаголюще: несть Бог, не видим Его! О, слепии! Почто не помышляете, яко неверием окамененнаго сердца своего себе огнь вечный готовите, и богоотступлением и прочими беззакониями кончину мира приближаете? Не слышасте ли из Писаний: яко невидимая Его от создания мира твореньми помышляема, видима суть: и присносущная сила Его и Божество. Очистите, убо, сердца своя и Бога узрите. Но пощади, Господи, от таковаго ожесточеннаго заблуждения и неверия ум, сердце и душу мою, да с верою, упованием и любовию образ пришествия Твоего всегда себе представляю и зову Ти: Свят еси, Господи, Боже наш, праведным судом Твоим всем нам в землю, от неяже взяты есмы, возвратитися повелевый и паки в день всеобщаго Воскресения из нея востати положивый. Свят еси, Господи, Боже наш, солнцу, луне и звездам некогда померкнути, а земли и всему, яже на ней, огнем преобразитися предопределивый, да вместо их явится небо ново и земля нова, в нихже правда живет. Свят еси, Господи, Боже наш, утаивый день, в оньже предстанут на суд вся племена и языцы, да восприимет кийждо по делом своим. Свят еси, Господи, Боже наш, Пастырю добрый и Судие Праведнейший, имеяй сести в день воздаяния Твоего на Престоле разсуждения, во еже разлучити же вся народы друг от друга, якоже пастырь разлучает овцы от козлищ; да поставиши овцы и уз одесную себе, а козлища ошуюю, и речеши праведным сладкий глас: приидите, благословеннии Отца Моего, и наследуйте Царствие, уготованное вам от сложения мира. Свят еси, Господи, Боже наш, от Него же нераскаянные грешницы услышат тогда со страхом: отъидите от Мене, проклятии, во огнь вечный, уготованный диаволу и аггелом его. Свят еси, Господи, Боже наш, обещавый Церковь Свою до конца мира непоколебиму соблюсти, во еже неодоленней быти ей от всех врат адовых. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 10
Спасти хотя древле Лота праведнаго от запаления с содомлянами нечестивыми, Владыко Господи, извел еси его вон из града и рекл еси рабу Своему Аврааму: яко аще бы и десять праведник имел град сей, не бы тогда погибл бысть, но оскудения ради святых в нем и мерзости грешных огню предается. Последи же и учеником Своим в притче плевел сельных глаголал еси, яко плевелы и пшеница, обоя купно имут расти до жатвы, да никогда прежде жатвы восторгающе плевелы восторгнется купно с ними и пшеница. От сего убо и назидаемся: яко токмо праведники Твоими мир сей стоит доселе, и ради святых Твоих, в мире живущих, даеши еще время и мне, грешному, покаятися, сего ради, неизследиме Боже, благодарно вопию Ти: Аллилуиа.

Икос 10
Царю царей, Господи Спасе, Агнче непорочный, на Престоле Славы седяй, яко лев, от колена Иудова и корене Давидова возсиявый и мир победивый. Ты един достоин еси разгнути Книгу Жизни великую и разрешити печати ея! Ты, яко Агнец, закланный, достоин еси прияти силу, богатство и премудрость, крепость и честь, и славу, и благоволение - ихже воспевают Ти чины Ангельстии и дуси праведных на небеси. Сподоби убо и мя, недостойнаго, с ними славити Тя в день великий и в сей час звати тако: Свят еси, Господи, Боже наш, Содетелю и Промыслителю наш, сияяй светом солнечным и одождяй на добрыя и злыя; наказуяй и милуяй, нарицаяй не сущая, яко сущая; низводяй даже до ада и паки возводяй. Свят еси, Господи, Боже наш, имеяй праведники просияти, яко солнце во Царствии Своем, - не погуби мя ради святых Твоих, но в Книзе Животней напиши мя и имя Твое начертай на челе моем. Свят еси, Господи, Боже наш, день весь жития моего совершен, свят, мирен и безгрешен даруй ми. Свят еси, Господи, Боже наш, Ангела мирна, верна наставника и хранителя души и тела моего на всяко время неотлучна посли ми. Свят еси, Господи, Боже наш, по благодати Твоей, изобильно на ны излиянной, презри моя прегрешения и подаждь вся добрая и полезная души моей. Свят еси, Господи, Боже наш, прочее время живота моего сподоби мя в мире и покаянии скончати, ожидающу дне славнаго явления Твоего. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 11
Пение всеумиленное приношу Ти, Господи, Спасе и Содетелю мой, и молю Тя, егда приидеши судити миру всему на облацех, не постыди мя, студныя дела сотворшаго, и не погуби мя, якоже погубил еси Вавилон - великую блудницу, но, веры ради моея и любве к Тебе, жителя Сиона Горняго соделай мя, идеже есть глас и велий народа многаго, яко глас вод многих и яко глас грома крепкаго, глаголющих: Аллилуиа.

Икос 11
Светильник мой угасе, елея же благих дел, во еже возжещи той, несть ми; и где обряшуся окаянный, сном греховным отягченный, егда постигнет мя внезапу полунощь - час кончины моея, или Суд Божий, яко тать найдет на вся живущая на земли? Но да не услышу аз, якоже юродивыя девы, грознаго гласа Жениха: не вем тя. Помози ми, о, Господи, наполнити сосуды души моея елеем благих дел, паче же милосердия и смирения, и звати Ти: Свят еси, Господи, Боже наш, даждь ми послужити меньшей братии Твоей, якоже Самому Тебе: алчущии и жаждущии насытити, странныя приютити, нагия одеяти, больныя и в темницех страждущия посещати, да сподоблюся части десныя стояния на Суде Твоем. Свят еси, Господи, Боже наш, отъими от мене дух гордости, праздности и уныния бесовскаго и подаждь ми дух смиренномудрия, целомудрия, кротости и радости духовныя. Свят еси, Господи, Боже наш, вложи в мысль мою мудрость сына Сирахова: помнити последняя моя, дабы во веки не согрешити. Свят еси, Господи, Боже наш, Женише, красный добротою паче всех человек, грядый в полунощи, - с мудрыми девами в рай введи мя. Свят еси, Господи, Боже наш, приими мольбу о нас и предстательство всех святых Твоих паче же простирающую к Тебе всегда о нас руце Своя Деву Пречистую, Тебе рождшую. Свят еси, Господи, Боже наш, огради нас святыми Твоими Ангелы и отжени от нас духов злобы под- небесных. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 12
Благодать Твою, Господи Боже наш, грешныя милующую, сведуще, аще и недостойное житие явихом; обаче надежду Воскресения и жизни вечныя имуще, христианския кончины живота нашего, безболезнены, непостыдны, мирны. Божественных Тайн причастны, и добраго ответа на Страшнем Судищи Твоем всегда просим, во умилении зовуще: Аллилуиа.

Икос 12
Поюще Твое непостижимое о людех и о мире, Тобою сотворенном, промышление, Вседержителю Отче, Сыне и Душе, Господи наш, славлю Тя, создание и раб Твой, и, яко чадо Церкве Православныя, чаю Воскресения мертвых и жизни будущаго века; в веце же настоящем молю Тя, Блаже: избави мя искушений, от мира, плоти и диавола находящих на мя, и укрепи в вере несумненней и любви к Тебе; да благочестне, чисто и свято прочее время живота поживу и спо-доблюся части правыя в день пакибытия, зовуща Ти: Свят еси, Господи, Боже наш, Мздовоздаятелю Праведный, судити имеяй на велицем Престоле Своем, от Егоже Лица побегнут небо и земля, и место их не обретется. Свят еси, Господи, Боже наш, всем нам явитися пред Судище Твое положивый, да воздаши коемуждо яже с телом содела: благая или злая; еже предопределил еси мне прежде дне того скончатися, - даждь ми безбедно прейти мытарства воздушныя бесовския и оправдатися на первом, частном, суде Твоем. Свят еси, Господи, Боже наш, сатану и аггелы его, зверя и лжепророка во езеро огненное на мучения вечныя Архангелом Твоим Михаилом ввергнути имеяй; того предстательством избави мя муки страшныя, тартара и тьмы кромешныя и геенны огненныя, идеже червь не умирает и огнь не угасает. Свят еси, Господи, Боже наш, всех Твоих ради святых, изряднее же святых Твоих щедрот и Крове Твоея, за ны пролиянныя, жителя мя сотвори Иерусалима Небеснаго, идеже несть ни смерти, ни плача, ни вопля, ни болезни, ни скверны некия, но жизнь безконечная, и слава Твоя присно осеняет его. Свят еси, Господи, Боже наш, прежде сих всех помози ми соблюдати словеса евангельския, творити волю Твою и прилежно внимати пророчеству Откровения Иоаннова, яко время близ есть. Свят еси, Господи, Боже наш, рекий в конец Богослову: яко, дондеже суд приидет, скверный - да сквернится еще, а святый - да святится еще. Ей, гряду скоро, и мзда Моя со Мною есть. Аминь! Ей, гряди, Господи Иисусе, молит Тя Церковь Твоя, зовущи: Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 13
О Великий и Непостижимый Боже! Альфа и Омега, начало и конец всему сущему, Иже вчера, днесь и во веки Той же, и у Него же несть пременения, погоже и лета не оскудеют. Приими сие малое акафистное моление мое в память грядущаго и Страшнаго Суда Твоего, всегда мною Тебе приносимое, и, по множеству щедрот Твоих, очисти беззакония моя, и имя мое в Книзе Живота напиши, и в юдоль плача не осуди, егда судити сядеши; и от пресветлаго лица Твоего не отлучи мене. Да егда скончаются дни века сего, и небеса и земля сия мимо идут, и светила, яко воск истаят, тогда, о, Всемилостиве, да узрю и аз стены Горняго Иерусалима, и купно со избранными десными Твоими овцами вниду во святый град сей и тамо насыщуся славы Твоея и буду пети Ти песнь нову во вся веки веков: Аллилуиа.

Этот кондак читается трижды, затем икос 1 и кондак 1

Кондак 1
Возбранный Воеводо и Господи, ада Победителю, хотяй паки приити со ангелы судити миру всему, не обличи моя тайная и лютая, сподоби мя деснаго стояния Твоего и милостию Твоею спаси мя, всегда зовуща Ти:

Икос 1
Ангелов Творче и Господи сил, умилосердися на мя грешную и блудную, наипаче в той день, егда небеса с шумом прейдут, стихии же сжигаемы разгорятся, егда солнце померкнет и луна не даст света и силы небесныя подвигнутся. Сего ради из глубины сердца моего взываю ти сице:
Иисусе, Сыне Божий, не осуди мя праведным судом Твоим.
Иисусе, Сыне Божий, избави мя шуияго от Тебе стояния.
Иисусе, Сыне Божий, сподоби мя одесную Тебе стати в час Суда.
Иисусе, Сыне Божий, не привлецы мене со грешники.
Иисусе, Сыне Божий, призови мене со праведники.
Иисусе, Сыне Божий, с делающими неправду не погуби мене.
Иисусе, Сыне Божий, водвори мене во обители праведных.
Иисусе, Сыне Божий, помилуй мя по велицей милости Твоей.

Кондак 2
Видя, яко кончина мира сего приближается, человекоубийца искони рассыпа нам прелести и соблазны, яко лев рыкает, иский кого поглотити; мы же скорбию сердца снедаеми, страха ради грядущих на вселенную мук, наипаче припадаем к Богородице, да спасет нас милостию Своею и да научит пети всех: Аллилуиа.

Икос 2
Разум неуразуменный разумети тщатся ангелы, ведуще, яко хощеши судити вселенную правдою и людям Своим в правоте: егда же поставятся престоли, река огненная ужасающая влечет всех пред Судилищем Твоим, где обрящуся аз, окаянный и блудный?! Тем же со страхом и трепетом вопию Ти:
Иисусе, Сыне Божий, сопричти мя ко овцам избраннаго Твоего стада.
Иисусе, Сыне Божий, Сыне Божий, от козлищ отлучи мя.
Иисусе, Сыне Божий, со пришедшими в первый час на виноградник Твой причти мя.
Иисусе, Сыне Божий, со наемники единодесятаго часа, ничтоже достойнаго соделавшими приими мя.
Иисусе, Сыне Божий, избави мя геены огненныя и тартара, егоже сатана трепещет.
Иисусе, Сыне Божий, водвори мя во обители Твоя, идеже ангелы непрестанно хвалу тебе поют.
Иисусе, Сыне Божий, червя неусыпающаго и прочих вечных мук свободи меня.
Иисусе, Сыне Божий, рая и вечнаго блаженства сподоби мя.
Иисусе, Сыне Божий, помилуй мя по велицей милости Твоей.

Кондак 3
Сила Вышняго восставит из праха тело мое и все естество человеческое трепещуще воскреснет. И кто стерпит страх тогда пещи горящей пред всеми, боящимися праведнаго Судища Твоего. Но Ты, о, Всесовершенный Господи, прежде глашения трубы воздаждь ми радость спасения Твоего, да пою Ти выну: Аллилуиа.

Икос 3
Имея Царство Твое, Царство всех веков, и владычество Твое во всяком роде, Отче щедрый, не судиши никомуже, но весь Суд отдал еси Сыну Твоему, Иже на престоле Славы Своея седяй, речет стоящим одесную Себе: Приидите возлюбленнии Отца Моего, наследуйте Царство, уготованное вам от сложения мира. Мы же грехами отягченнии и в страстех свое житие иждивше со умилением глаголем Ти сице:
Иисусе, Сыне Божий, хананею помиловавый, помилуй и меня окаяннаго.
Иисусе, Сыне Божий, сниди и ко мне милосердием Твоим, якоже омилосердовал еси.
Иисусе, Сыне Божий, разбойнику двери рая отверзый, отверзи и ми двери человеколюия Твоего.
Иисусе, Сыне Божий, помяни мя грешнаго во Царствии Твоем, якоже того разбойника.
Иисусе, Сыне Божий, манасиино воздыхание приемый, приими и мое воздыхание, грешника непотребнаго.
Иисусе, Сыне Божий, приемый покаяние праотца Давида, приими и мои в покаянии слезы и очисти мя от греха моего.
Иисусе, Сыне Божий, помилуй мя по велицей милости Твоей.

Кондак 4
Буря злых напастей грядет на ны, еще же и моры, и глады, и трусы по местам, и смятение языков, и за множество прегрешений оскудеет любовь многих: предаст же брат брата на смерть и дщерь матерь свою пред наступлением дня Господня - велкаго и страшнаго, но Ты, Господи, от Марии воссиявый, спаси ны, имиже веси судьбами, да все едиными устнами и единым сердцем поем Тебе: Аллилуиа.

Икос 4
Слышаще возлюбленнаго ученика Твоего Иоанна, яко змий из бездны страшен будет на малое время от темницы своея, антихрист сядет в храме, требуя поклонения себе, восплачем братие и сестры и возопиим ко Господу, имущему власть низводити даже до ада и паки возводити:
Иисусе, Сыне Божий, не допусти мене покланятися врагу Твоему.
Иисусе, Сыне Божий, лучше есть умрети до дне онаго.
Иисусе, Сыне Божий, избавь меня от сего страшнаго искушения.
Иисусе, Сыне Божий, ни муки, ни смерть не разлучат меня от любви Твоея.
Иисусе, Сыне Божий, Женише наш Сладчайший, отверзи нам двери славнаго Царствия Твоего.
Иисусе, Сыне Божий, среди дев благоразумных да обрящуся и аз грешный.
Иисусе, Сыне Божий, положи вся враги Твоя в подножие ног Твоих.
Иисусе, Сыне Божий, Сыне Божий, собери други твоя во едино окрест Тебе.
Иисусе, Сыне Божий, помилуй мя по велицей милости Твоей.

Кондак 5
Боготочною Кровию искупил нас еси от клятвы законныя, и ныне от страстей и мук спаси: сподоби же нас деснаго стояния Твоего, покрый нас кровом крылу Твоею, отжени от нас всякаго врага и супостата, да поем Тебе, Благодателю нашему: Аллилуиа.

Икос 5
Слышавше Предтечу Твоего глаголюща: покайтеся, приближи бо ся Царствие Божие в оньже без оглагольников, обличаются, без свидетелей осуждаются, книги деяний человеческих разгибаются и является все их тайное, тогда же никто не возможет помощи: ни отец, ни мати, ни брат не избавит осуждения, тем же из глубины сердца Ти глаголем:
Иисусе, Сыне Божий, посетивый Закхея мытаря, посети и мою душу.
Иисусе, Сыне Божий, избавь меня мытарства преисподней.
Иисусе, Сыне Божий, не отринул еси блудницу к Тебе со слезами припадшую, не отрини мене, подобнаго ей.
Иисусе, Сыне Божий, не отринувый, не отрини мене, преступавшаго заповеди Твоя.
Иисусе, Сыне Божий, воскресивый сына вдовицы, воскреси и мою душу, умершую через грехи.
Иисусе, Сыне Божий, Иаирови возвративый чадо, да придет ко мне паки любовь детская, нелицемерная.
Иисусе, Сыне Божий, извлекий Петра утопающаго, извлеки и мене из рова погибельнаго.
Иисусе, Сыне Божий, и мене трижды призови в служение Твое.
Иисусе, Сыне Божий, помилуй мя по велицей милости Твоей.

Кондак 6
Проповедницы богоноснии Твоего славнаго пришествия будут Енох и Илия, яко две маслины и яко два светильника, горящии пред Богом. По окончании же пророчества своего убиени будут и тридневно не оставят земли, но по сем победоносно восстанут ужасая неверующих и вознесутся на небесе, поюще Богу: Аллилуиа.

Икос 6
Возсияет вселенней просвещение истины Твоея, егда речеши и сущим ошуюю Тебе: "Изыдите от мене проклятии во огнь вечный, уготованный диаволу и аггелом его". Кто потерпит онаго страшнаго изречения? Но, о, Владыко долготерпеливый, воистину страшуся праведнаго Суда Твоего, боюся геены и тартара, ужасаюся тьмы кромешныя и общения с проклятыми. Тем же молю Твое благоутробие: яко Бог, грехи моя вся презрев, исторгни мя из бездны сея муки, конца не имеющей, да зову Ти сице:
Иисусе, Сыне Божий, Ты еси Един Судия Нелицеприятный.
Иисусе, Сыне Божий, слава праведному Суду Твоему.
Иисусе, Сыне Божий, не осуди меня со грешники, нарушающими закон Твой.
Иисусе, Сыне Божий, уповаю на благость Твою.
Иисусе, Сыне Божий, спаси мя ими же весть судьбами от сего вечнаго осуждения.
Иисусе, Сыне Божий, зриши от престола славы Твоея, яко боюся осуждения Твоего.
Иисусе, Сыне Божий, прежде онаго Суда к покаянию обрати мя.
Иисусе, Сыне Божий, душа моя и сердце мое жаждут покаяния и прощения.
Иисусе, Сыне Божий, помилуй мя по велицей милости Твоей.

Кондак 7
Хотяй паки приидти со ангелы и воздати каждому по достоянию деяний его. Господи, яко Давид вопию Ти: от тайных моих очисти мя и от чуждых пощади рабу Твою егда бо небо свившись, аки свитое, и всякий остров и всякий град подвигнется с места своего, море же и земля, и смерть и ад отдадут своя мертвецы. Спаси меня, Господи, вопию Ти, всегда зову Вседержителю Богу: Аллилуиа.

Икос 7
Новаго же небеси и новой земли по обетованию Господа чаем, в них же правда живет: прежнее небо и прежняя земля огню блюдомы для погибели нечестивых человек. И не помянут прежнюю землю, не взыдет на сердце их память от ней, ибо радость и веселие обрящут на новой земле; мы же таковому промышлению о нас дивящеся, вопием верно:
Иисусе, Сыне Божий, да услышу и аз вожделенный глас Твой: "Се ново вся творю".
Иисусе, Сыне Божий, да не буду удален тогда от Тебе.
Иисусе, Сыне Божий, верую, что ново все твориши, прекраснее и великолепнее всех прежних.
Иисусе, Сыне Божий, се будет новый Эдем.
Иисусе, Сыне Божий, сподоби мя узрети новое небо и новую землю огнем очищенную, в ней же правда живет.
Иисусе, Сыне Божий, да не сокрыются тогда вся чудеса Твоя от очес моих.
Иисусе, Сыне Божий, к наследникам новыя земли Твоея тогда причти меня.
Иисусе, Сыне Божий, гражданином новаго неба учини меня тогда по благости Твоей.
Иисусе, Сыне Божий, помилуй мя по велицей милости Твоей.

Кондак 8
Странное ангельским и человеческим мыслям будет восстание нечестивых против Бога Всевышняго. Соберется их великое множество против Бога, аки песок морской, но Христос убьет антихриста Духом Уст Своих и явлением пришествия Своего упразднит его. Вернии же вси, видя праведный Суд Божий, возопиют Богу: Аллилуиа.

Икос 8
Весь собор ангельский удивится, егда настанет час Страшнаго Суда Твоего, Господи, восплачется человечество великим плачем: грешнии же видяще трус и вся бываемая, бияще перси своя, возопиют: горы, падите на нас, и холми покрыйте нас от Лица Сидящаго на престоле, от гнева Агнца, прииде бо велий день гнева Его, и кто может устоять? Мы же, грешнии, ведуще сие, глаголем:
Иисусе, Сыне Божий, призри милосердно на нас с высоты Престола Твоего.
Иисусе, Сыне Божий, милосердию Твоему несть конца.
Иисусе, Сыне Божий, прими в страшный час сей молитвы Матери Твоея.
Иисусе, Сыне Божий, не имамы иныя Заступницы, разве Ея.
Иисусе, Сыне Божий, аще дел не обрящеши в нас, достойных милосердия Твоего, веру вместо дел вмени нам по великому человеколюбию Твоему.
Иисусе, Сыне Божий, вем яко вера без дел мертва есть.
Иисусе, Сыне Божий, не отрини нас во тьму кромешную, идеже есть плач и скрежет зубов.
Иисусе, Сыне Божий, жаждем спасения и рая вечнаго.
Иисусе, Сыне Божий, помилуй мя по велицей милости Твоей.

Кондак 9
Все естество ангельское воскликнет гласом велиим: "Благословен грядый во имя Господне, Вышний Сыне Живаго Бога, Слово Соприсносущное Отцу". От гласа же воскликновения сего ужаснется небо и подвигнутся основания земли; мы же грешнии бренными устами возопиим Богу: Аллилуиа.

Икос 9
Ветии многовещаннии не возмогут изрещи всех горестей дней тех, егда увянет всякая красота человеческая, море восшумит вельми, вселенная же отрясет звезды своя, якоже смоковница отрясет от ветра спелыя смоквы своя; всяк раб и всякий свободь скрыются в горах, пещерах и пропастях земных; и возжелают людие смерти, но смерть убежит от них. Мы же, грешнии, ведуще все сие грядущее на ны, возопием верно:
Иисусе, Сыне Божий, воистину правы Суды Твои.
Иисусе, Сыне Божий, по милости Твоей научи мя оправданиям Твоим.
Иисусе, Сыне Божий, да не услышу грознаго гласа Твоего: "Не вем вас."
Иисусе, Сыне Божий, призови нас во обители Твоя.
Иисусе, Сыне Божий, даждь и мне узрети Тя на облацех небесных.
Иисусе, Сыне Божий, да не устрашуся Тебе во славе Твоей.
Иисусе, Сыне Божий, во светлостях святых утеши и мя окаяннаго.
Иисусе, Сыне Божий, да восплачу о гресех своих.
Иисусе, Сыне Божий, помилуй мя по велицей милости Твоей.

Кондак 10
Спасти хотя мир от прелести вражия, послал еси Сына Твоего, Иже искупил ны от клятвы законныя Честною Своею Кровию. Апостолы же передаша Божественныя словеса Его: Се гряду скоро и возмездие Мое со Мною, яже воздати комуждо по делам его. Мы же, окаяннии, ведуще грехи своя, восклицаем Богу: Аллилуиа.

Икос 10
Стену необоримую в Тебе стяжахом, Богородице Приснодево, и душ всесовершенное спасение, аще бы не Ты предстала молящи, кто бы нас избавил от толиких бед, грядущих на вселенную: егда небесе прейдут и земли основания сотрясутся и приложатся горы в бездны морския. Ты же, Всеблаженная, простираеши присно руце Твои к Сыну Твоему, молящи о нас, погибающих, Твоея помощи, Твоего заступления к Сыну Твоему о взывающих тако:
Иисусе, Сыне Божий, рабий зрак приемый, помилуй рабов Твоих.
Иисусе, Сыне Божий, молитвами рождшия тя Богородицы помилуй нас.
Иисусе, Сыне Божий, молитвами Апостолов Твоих помилуй нас.
Иисусе, Сыне Божий, сии бо преподаша нам Евангелие Твое.
Иисусе, Сыне Божий, молитвами святых мучеников Твоих пощади души наша.
Иисусе, Сыне Божий, терние бо жития сего бреннаго мучат нас до крове.
Иисусе, Сыне Божий, молитвами святых Ангел и Архангел отжени от нас отчаяние.
Иисусе, Сыне Божий, предстательством хранителя нашего пощади нас в день страшнаго Суда Твоего.
Иисусе, Сыне Божий, помилуй мя по велицей милости Твоей.

Кондак 11
Пение всеумиленное приносим Ти, Царю Святый, Судие живых и мертвых. Сподоби и нас, Владыко, срести Тя на облацех, егда сядеши судити миру всему и деяния всяческих обнажатся: не ввержи нас тогда во тьму кромешную, но спаси нас, да зовем Ти выну: Алллилуиа.

Икос 11
Светоподательна светильника зрим возлюбленнаго ученика Твоего и Апостола Иоанна, емуже открыл еси вся тайны Царствия Твоего, грядущая возвестил ему, да всяк веруяй в Тя не погибнет, но имеет жизнь вечную, тем же вопием Ти сице:
Иисусе, Сыне Божий, Слава Тебе, утаившему сия от премудрых и разумных.
Иисусе, Сыне Божий, Слава Тебе, открывшему сия младенцам в вере.
Иисусе, Сыне Божий, даждь нам памятовати всегда Второе и страшное Пришествие Твое.
Иисусе, Сыне Божий, даждь памятуя сия избегать тяжких падений греховных.
Иисусе, Сыне Божий, даждь нам разум угождати Тебе, Солнцу Правды.
Иисусе, Сыне Божий, да покрыют малые добродетели наша великие наши беззакония.
Иисусе, Сыне Божий, страху Твоему пригвозди нас.
Иисусе, Сыне Божий, да убоимся творити волю князя тьмы.
Иисусе, Сыне Божий, помилуй мя по велицей милости Твоей.

Кондак 12
Благодать подаждь ми, Сладчайший Иисусе, да воспою Второе и Славное Пришествие Твое, и, памятуя горести и беды, грядущие на ны, возмогу избегнути сладости и прелести мира сего лукаваго, иже во зле лежит и воззову Богу во умилении сердца: Алллилуиа.

Икос 12
Поюще Твое Второе Пришествие, веруем вси, яко сядеши на Престоле Твоем предстоящим Тебе ангелам, пророкам, апостолам, мученикам и всем святым, и соберутся пред Тобою все народы от Адама первозданнаго и горе тогда всем, не имущим жития праведнаго, и аще праведник едва спасется, где обрящуся аз окаянный и паче всех грешнейший, не смею взирати на небо, токмо молюся:
Иисусе, Сыне Божий, милостив буди ми грешному.
Иисусе, Сыне Божий, помилуй мя, аще и беззакония превзыдоша главу мою.
Иисусе, Сыне Божий, наг от дел добрых стою пред Тобою.
Иисусе, Сыне Божий, помилуй мя, аще и струпы греховные покрыша тело мое.
Иисусе, Сыне Божий, помилуй мя, аще и недостоен есть воззрети на высоту небесную.
Иисусе, Сыне Божий, помилуй мя, аще и связан есть многими узами железными греха.
Иисусе, Сыне Божий, помилуй мя, аще же и ничтоже сотворих достойно милосердия Твоего.
Иисусе, Сыне Божий, в руце Твои милосердныя вручаю душу мою окаянную, сотвори милость со мною.
Иисусе, Сыне Божий, помилуй мя по велицей милости Твоей.

Кондак 13
О преславный и всещедрый Иисусе Христе! В последние дни грядый судити всю вселенную правдою, нынешнее приемши приношение, избави нас от мук и страстей, сподоби же нас деснаго стояния Твоего, да зовем Ти, Благодетелю нашему: Аллилуиа.
Этот Кондак читается трижды, затем Икос 1 и Кондак 1.

Молитва Господу, грядущему судити живых и мертвых
Господи, Царю Святый, Единородные Сыне Живаго Бога, искупивый нас Кровию Своею! Рекий Апостолом Своим: "Се гряду скоро и возмездие Мое со Мною, дабы воздати коемуждо по делам его". Умилосердися на нас грешных и блудных и непотребных рабов Твоих, ничто же достойно соделавших, недостойных милосердия, но достойных всякаго осуждения и муки. Даждь нам, Господи, прочее время живота нашего без порока прейти, наипаче же угодити Тебе, Солнцу Правды. Сподоби нас работати Тебе во вся дни живота нашего, егда же приидеши, Боже, на землю со славою, сподоби нас одесную Тебе стати, Судие Праведный. Не помяни наших беззаконий, но очисти их росою милости Твоея, отлучи от козлищ нас, Владыко Господи, части шуия нас избави. Сподоби нас отложивши ветхаго человека в новаго облещися и узрети огнем очищенное небо и землю Твои, в них же правда и радость и веселие живут.
Ты бо Источник Един жизни и сладость, и освящение любящих Тя, Господи, и Тебе славу воссылаем, со Безначальным Твоим Отцем и Пресвятым и Нетленным и Животворящим Твоим Духом, и ныне и присно и во веки веков. Аминь.